Shillong, Naiwieng 04: Ban pynpaw ia ka jingsngew pyrshah halor ka jingthmu jong ka sorkar pdeng ban pyntrei kam ia ka Citizenship Amendment Bill, ka seng KSU mynta ka sngi kala pynlong ia ka jingrah ia ki plakard ha lynti iaid jong u President ka Ri India ban leit sha NEHU ha ki bynta jong ka Golflink.
Na ka liang jong u General Secretary jong ka seng KSU u samla Donal V Thabah u la ong ba kane ka jingrah jong ka seng ia ki plakard ka long ban pynpaw ia ka jingpyrshah ia ka ha kaba ia dei bad ka CAB da kaba jar jar.
Na ka liang jong ki pulit kiba la ap phara shilynter ka lynti naduh Raj Bhavan haduh ban da poi sha NEHU haba kila iohi ia kane ka jingleh jong ki KSU kila pyrshang ban beh ia ki bad kane ka jingleh ka jan wanlam sha ka jingiahuri hura hapdeng ki pulit bad ki dkhot jong ka seng KSU.
Na ka liang jong u Samla Thabah u la ong ba kaei kaba ka seng ka kwah kila ioh ban rah ia ki plakard bad ha dien ka jingiakren kila pynjem noh bad kynriah na surok ha ka por ba iaid u president, hynrei kila ioh ban rah ia ki plakard ban pynpaw ia kan ka jingpyrsah ka jong ki.
