Shillong, Naitung 05: Ka Dorbar Shnong Umkiang, ka sngewkhia jur halor ka jingbym shim khia ka Sorkar lyngba ka Department MeECL ban pynioh Transformer hapoh ka Dong Pahar Umkiang.
Ha ka jingshisha ki nongshong Shnong hapoh kane ka Dong ki la shong dum khlem jingshai (Light) kumba ar bnai tam ei ei, kata naduh u bnai April 20 tarik snem 2024, na ka daw ka jingsniew ne ka jingduh noh jong utei u Transformer uba don hapoh ka Dong Pahar Umkiang.
Bad na ka liang u Waheh Shnong, Shri.Lasting Pala, mar mar la pyntip sha ki bor ba dei peit, kata sha ka Office jong u SDO bad Engineer jong ka MeECL kaba don ha Moowakhu, Khliehriat, East Jaintia Hills District, halor kane jingeh kaba kine ki nongshong Shnong ka Dong Pahar ki iakynduh.
Bad man ka por u Waheh Shnong u la ju pynkynmaw ia kine ki Sahep shaphang kane ka jingjia ne ka jingduh noh u Transformer, hynrei ka jubab ba ioh na kine ki Sahep ka long ba ki lah dep ban pyntip sha Shillong , hynrei haduh mynta ym shym la ioh ia ka jubab na ka bynta ban ioh Transformer bathymmai na ka bynta Dong Pahar Umkiang.
Te kane ka jingleh bym suitniew jong kane ka Sorkar lyngba ka Tnad MeECL, ka la pynjynjar ia ki nongshong Shnong ban shong haba dum khlem jingshai wat lada dei ka hok ban ioh jingshai bad ka long ruh kum ka jingiehbein ia ngi kiba sah sha kyndong ne ka thain border.
Bad sa shisien ngi kyrpad ia ka Sorkar lyngba ka Tnad Bording (MeECL) ban ai bad wan buh Transformer noh da uba thymmai khnang ba kan long ka jingmyntoi ia ki nongshong shnong ne ki nongpyndonkam bording, kane ka long katkum ka kyrwoh kaba la phah da u bah Nicholas Lyngdoh secretary dorbar Shnong Umkiang.
