Leh aiu ki Labour Inspector, Pynhai ka FKJGP 80 ngut ki bar jylla na Upper Shillong

Shillong, Naitung 07: Ka FKJGP Lai Shnong Area Unit, kaba hap hapoh ka jingpeit jing khmih jong ka FKJGP Upper Shillong Circle kum shi bynta ban pyrkhing bad ban teh lakam ia ka jing wanrung kyrthlep jong ki Bar Jylla kala pynlong ka jing kynra ha kiba bun ki jaka jong ka Thain Upper Shillong hi baroh kawei ha ki ar sngi kynthih kata ha ka 3^rd August bad mynta ka sngi 6^th August 2018.

Ha katei ka jingkynra ia ki Nongtrei Bar Jylla bala ialam da u Samla Hopewell Kharkongor, President FKJGP Lai Shnong Area Unit bad u Samla Shahbok Langstieh, General Secretary FKJGP Lai Shnong Area Unit ha ryngkat ka jing ia don ryngkat ki Enforcement jong ka KHADC la lap ba bun ki Bar Jylla kiba wan ha ka dur jong ki nong trei bylla kim shym la don satia ia ki work permit, Labour License bad kumjuh ruh ka Trading Licence.

Ha kitei ki ar sngi ba ka seng kala pynlong ia ka jing kynra ba kyndit kyndit kynthup ruh naduh ki Dukan, Resturant, Guest House bad kumjuh ruh ia ki ing ba dang sdang pyntrei thymmai ha ka thian Upper Shillong naduh 6^th Mile ter ter shaduh ki thain Mylliem, ka Seng ka ryngkat ki Enforcement jong ka KHADC kala khang kyrdep ia kiba bun tylli ki dukan, Resturant  bad  ki Guest House kiba I shan khmat bad ia kiba suba jur ba la pyniad da ki Bar Jylla namar ba kim don satia ia ka Trading Licence. Ka Seng kala pynher krad ia ki Bar Jylla kiba la kot sha ka 80 Ngut namar ba kim don satia ki jing pynshisha kiba biang kiba kynthup ia ka work permit & Labour License.

Ka Seng ka dap da ka jing lyngngoh kaba khraw ban iohi ba ki bar jylla ki shlan ban wan leh ia ki kam khaii laitlan bad ban wan trei laitluid ha ka Thain Upper Shillong khlem da khein snep satia ia kita ki kyndon ain bala pyntreikam da ka Sorkar Jylla bad ruh khlem da burom shuh ia ka iktiar jong ka District Council na ka bynta ka Trading Licence & Labour License. Na ka liang jong Samla Hopewell Kharkongor, President bad u Samla Shahbok Langstieh, General Secretary FKJGP Lai Shnong Area Unit ki la buh ka jingmaham ia kino kino kiba donkti ban pynrieh tngen ia ki bar jylla ha ka thain hi baroh kawei da kaba ong ba ka Seng FKJGP hi kan ym shong kli kti satia ban peitngor ia ka jing wanrung kyrthlep jong ki bar jylla ha ka thain hi baroh kawei.

Ha kawei pat ka liang na ka liang jong u Samla Kitboklang Nongphlang, President FKJGP Upper Shillong Circle ula buh ka jingkylli ba ki leh aiu kita ki Labour Inspector ba la thung da ka Sorkar Jylla ha kaba u la pynpaw ruh ia ka jing artatien ba lehse ka don kaei re kaei sha lyndet namar ki briew kiba la pynkup bor ha ka jaka ba kin long ki nong tehlakam ban pyntreikam ia ka ain bala shna da ka sorkar phewse ki long pynban tang ki nong peitkai.

Na ka liang jong utei u samla Nongialam u la ai khublei kyrpang ia ki Dkhot jong ka Seng kiba la trei shitom ban long ki nongiada iala ka jong ka Jaitbynriew bad kumjuh ruh ia ka office jong ka KHADC Shillong ki bym ju kyntait satia ban ai ia ka jingiatreilang ha kiba bun ki khep na ka por sha ka por, ha kawei pat ka liang na ka liang jong u Samla Kitboklang Nongphlang, President FKJGP Upper Shillong Circle ula byrthen ba na ka liang jong ka Seng shen kan sa iakynduh ia ki bor sorkar ban dawa ba ka dei ban pyrkhing ia ka jing wanrung laitlan jong ki Bar Jylla bad ha kajuh ka por ban ai da ka jing pynsaja kaba tyngeh ia kita ki Labour Inspectors ki bym pyndep satia iala ka jong ka kamram da kaba ong: “Yn myntoi aiu ban siew kai ia ka tulop sha ki briew ki bym trei hok ia ka kam, namar kiba pynlong ia ka jingkynra mynder na ka por sha ka por dei beit tang ki Dkhot jong ki Seng Bhalang”.