Shillong, Rymphang 23: Shisnem eiei mynshuwa ki shipai ka Hynniewtrep Achik National Movement ki la leit da ki spah ngut ban pynlong jingiakhih ha Jantar Mantar ha nongbah Delhi, ban dawa na ka bynta ki 3tylli ki mat jong ka jaitbynriew kata halor ka Inner Line Permit, ban pynrung ia ka ktien Khasi ha ka khyrnit ba Phra jong ka Riti synshar ka Ri India bad ban pynbeit noh ia u pud u sam hapdeng ka jylla Meghalaya bad ka Assam.
Kine ki mat jingdawa ka seng bad ka ba ka jaitbynriew khasi ka la dawa la slem, hynrei, tad haduh mynta ruh ka sorkar India ka dang sngap jar jar halor kine ki mat jingdawa, kumta sa shisien biang ki shipai jong ka HANM kin sa leit ban pynkhihwin ha nongbah Delhi ban pynkyndit thiah biang ia ka sorkar India ba ka dei ban pynurlong ia kine ki jingdawa.
Ka kyrwoh khubor ba la phah da ka seng HANM ka pynpaw ba, Ka kynhun ba nynngkong ka ban ialam da u President rangbah u bah Lamphrang Kharbani kan mih ha ka 23 tarik u rymphang 2025 bad ka kynhun kaba ar pat kan mih ha ka 24 tarik u rymphang 2025.
Ka jingiakhih ka HANM kan long ha ka 25 tarik u rymphang 2025. Ha kane ka sngi, ki dkhot kin iakhih sha Delhi ki dkhot ka HANM kiba don ha kylleng ka ri khasi Jaintia ruh kin ia snohkti lang kum ka dak ka jingaimynsiem da kaba pynher lama ha kylleng ki jaka kum ha Motphran bad shawei pat ki jaka.
