Shillong Jymmang 29: Ka Hynniewtrep National Youth Movment (HNYM) mynta ka sngi ka la leit ban iakynduh ia u Chief Secretary ka sorkar jylla u bah DP Wahlang, ban kyntu ban phah pynkylla noh ia baroh ki jingthep kam hapoh ka Para 2.2 jong ka Reservation Policy.
U President ka HNYM u bah Louis Dohtdong haba kren sha ki lad pathai khubor u la ong ba hapoh kane ka para 2.2 ‘La kdew ba ha ki District Level la ai ka Combine Reservation kaba 80 percent bad dei ban bhah kham kyrpang ia ki trai shnong jong ki District’.
Katkum ka jing ong u bah Louis na ka liang u Chief Secretary u la kular ba un rah ia kane ka mat ban iatai ha ka jingialang kaban long ha ka 31 Jymmang ba la khot da ka sorkar jylla ia baroh ki dkhot jong ki sengbhalang ban iatai halor ka Reservation Policy lane ka Roster System.
Ha kajuh ka por, u nongialam ka HNYM u la ong ba ka seng kan ap ia ka shithi na ka sorkar bad lada ha ka shithi ka sorkar ka khot jingialang ban iakren halor ka Roster, ka seng kan nym leit ban iashim bynta.
Ka seng HNYM haba peit ia ka jingkhot jong ka sorkar lada ka khot ban iakren halor ka Roster kin nym pdiang hynrei lada ki khot ban iakren halor ka Reservation Policy ki kloi ban leit ban iakren, la ong u bah Louis.
Ha kajuh ka sngi, ka seng HNYM sengkmie bad ka HNYM Ri Bhoi District ki la leit ban sngewlem bad ai jingkyrshan ia ka jingshah thngan jong u bah Ardent ha Additional Secretariat.
