Shillong, Iaiong 25: Ka Hynñiewtrep Youths’ Council Sohïong Circle hapoh ka jing ïalam u President, Samla Purningstar Shabong bad ka jingsynran lang u samla Joplang Kharnaïor uba dei u Assistant Education CEC ka la leit ïa kynduh ïa u EM jong ka Khasi Hills Autonomous District Council uba dei peit ïa ka Labour Licence ha kaba ïadei bad ka jingdon ki bar jylla kiba trei be-aiñ ha ka M/S Unique Structure & Tower Limited hapoh ka jing peit jong ka Power Grid kaba don ha Umsohïong, Sohïong.
Kum ban shu pynkynmaw ba ha ka 13tarik Rymphang, 2019 ka seng kala leit jurip ïa ka Labour Licence ïa ki tei ki bar jylla bad la lap ba kitei ki bar jylla kim don ki kot ki sla kiba biang. Te na ka liang jong ka seng kala ai por shi taïew ïa ki tei ki briew ba kin pynbiang ïa ka Labour Licence.
Hynrei ha ka 20tarik Rymphang, 2019 ka seng kala leit jurip biang la kitei ki bar jylla kila dep pynbiang ne em ki kot ki sla bad la lap ba ki tei ki bar jylla kim pat pynbiang ïa ka. Kumta ka seng kala phah leit phai noh mardor ïa ki tei ki bar jylla katba kim pat don ka Labour Licence.
Kham hadien, ka Seng kala ïoh jingtip ba ki tei ki bar jylla kila wan trei biang bad ha ka 14tarik Ïaiong, 2019 ka la leit jurip biang bad ka lap ba kim shym la pyndep ïa ka tei ka Licence kat kum ka jingdonkam. kumta ka seng la phah leit phai biang noh ïa ki tei ki nongtrei bar jylla bad ha kane ka por la wan mih ki pulit na ka Sohïong Police Outpost kiba pyn sangeh mardor ïa ka jing phah leit phai ka seng ïa ki tei ki bar jylla.
Ka long ka jinglyngngoh shisha ban lap ba ka tei ka Company kam shym la ïoh jingbit eiei wat na ka District Council ha kaba ïadei bad ka tei ka jing buh tiar bad ka jing pynlong ïa ka jingtrei ha Umsohïong bad ka Licence kaba ka tei ka Company ka ïoh na ka KHADC ka dei na ka bynta ka jingtrei ha Lapalang, kumno ka lah ban long ba la ïoh licence ha kawei ka jaka bad la leit pyntrei pat sha kawei ka jaka bad ki ïoh bor naei ban wan buh tiar ne pyntrei ha Umsohïong ne phah trei be-aiñ ïa ki tei ki bar jylla.
Halor kane, ka pyn lyngngoh ïa ka seng ha kaba ïadei bad ka jing kloi jong ki pulit ban wan ïada ne ban hukum ba ki tei ki bar jylla ki bym don Labour Licence ki dei ban trei beit ïa ka kam kumba ki juh trei baroh shi katta.
Kumta ka seng kala kyntu ïa u EM ba dei peit ïa ka Labour ba un shim khia halor ka tei ka kam khnang ba kan wan ym wan rah kano kano ka jing ïuhroit ïa ki aiñ jong ka KHADC bad ïa ka NOC ba la ai da u Rangbah shong kaba la kren shai ba yn ym shah ban trei ïa ki non-tribal ki bym don ïa ki kot ki sla kiba biang. Ha ka juh ka por ruh, kane ka jing leh jong ka tei ka Company ka dei ka jing ñiewbeiñ ïa ka KHADC namar ka leh pyrshah ïa ki kyndon bad ka leh buit tuh ïa ka Licence kaba la ïoh na ka KHADC. Kumta na ka liang jong u EM ula kular da kaba shai ba un shim khia halor ka tei ka kam.
