Shillong, Nohprah 01: Mynta ka sngi ki nongialam ka BJP, kaba la ialam da u myntri ba dei peit ia ka tnad ri jngri ka sorkar jylla, u bah A L Hek kila leit ban ia kynduh ia ki samla pule PG kiba ia khih shah thgnan ha North East India of Ayurveda bad Homeopathy, ha Mawdaingdiang.
Ha kane ka jingleit ia kynduh ki nongialam jong ka BJP kila kyntu ia kine ki samla PG kiba dang iai bteng ia ka jingiakhih ka jong ki kabala kot hynriew sngi mynta ka sngi ba kin sangeh noh shuwa shipor ia ka jingiakhih ka jong ki.
La ong ba khamtam wei na ki samla pule la poi sha hospital na kadaw jong ka jingshitom, haba kyntu ia ki samla pule ba kin sangeh ia ka jingiakhih ki nongialam jong ka BJP la kular ia ki samla pule ba kin sa shim khia ban ia kren bad ka sorkar pdeng.
Ha kane ka jingleit sha NEIAH ki nongialam ka BJP kila ia kynduh ia ki bor ba peit ia ka jaka pule ha kaba la pynshai ia ka jingeh jong ki samla, kaba ki dawa ban pynkiew ia ka bai bam, ka jingpyniasoh bad ka skul bah NEHU.
Katkum ka jingpynshai na ki bor pyniaid jong ka NEIAH ki nongialam jong ka BJP kila sngewthuh ba ia ki jingdaw kiba ha khmat eh jong ki samla pule lah ban pynurlong ha pdeng 8 bad shiphew sngi, kane ka long katkum ka jingbatai kiba pyniaid iaka tei ka jaka pule.
