Shillong, Risaw 10: Ka kynhun jong ki nonghikai SSA ka ba don ha poh ka shatri jong ka Meghalaya SSA School Association (MSSASA) ia ka ba la lam khmat da u President u bah Aristotle C Rymbai mynta ka sngi ka 10 tarik u Risaw 2024 ki la leit ban ia kynduh ia ka kynhun jong ki nonghikai SSA.
Kane ka kwei ka kynhun nonghikai SSA ki ba don hapoh ka shatri jong ka All Meghalaya SSA School Teachers Association (AMSSASTA) ki ba pynlong ia ka jingiakhih ba khlem pud sngi ha Madan Malki ban khot ban ia trei lang na ka bynta ki mat jingdawa ki ba kine ki artylli ki kynhun jong ki nonghikai SSA ki la buh ha khmat jong ka sorkar.
Ha ka jingiakren bad ki nongthoh na ka liang u bah Aristotle C Rymbai u la ong ba kane ka sien jam ka ba ki la shim ban ia treilang ka long ban wanrah ia ka jingmyntoi na ka bynta ki nong hikai skul SSA bad u la ia thuh ruh ba ka seng kan sa khot da ka general executive committee ban pan jingmut ha ka ba iadei bad kane ka sien jam.
U bah Rymbai u la pynpaw shai ruh ba ka jingwan jong ki kam dei ba ki wan ai jingkyrshan hynrei ka dei na ka bynta ban ia kren sngew thuh jingmut lang na ka bynta ki mat jingdawa. U la ong ruh ba kat kum ka jingkwah jong ki ka long ba kin don tang kawei ka kynhun hynrei kane ka shong ha ka jingsngew thuh jong ki nong ialam jong ka AMSSASTA.
U bah Rymbai u la pynpaw ruh ba u don ka jingkyrmen ka ba skhem ba ka sorkar jylla kan wan rah da ka policy ka ban lah ban kynthup lang ia ki sha poh ka tnad pule puthi jong ka Jylla .
Ha ka jingiakren bad u Adviser jong ka AMSSASTA u bah Batista M Lyngwa u la ong ba ia ka jingtyrwa jong ka MSSASA yn sa khot da ka general executive committee ban iathir iatai wat la na ka liang jong ka AMSSASTA kan dang bteng sha khmat ban pynurlong ia ka jingdawa kumba ki la pynlong iaka jingiakhih ka ba khlem pud sngi ka ba la kynjoh sha ka sngi ka ba 10.
Kum ban shu pyntip ba ka All Meghalaya SSA School Teacher Association ka la daw ana ka sorkar ba kyntiew ia ka tulop jongki 100 na ka 100, kat ba ka Meghalaya SSA School Association kala daw ana ka sorkar ba kan pynkynriah noh ia ki 13,000 ngut ki nonghikai SSA na ka state implementation Society sha ka tnad pule puthi khnang ban pynskhem ia ka kam hikai skul jong ki.
