Shillong, Nailar 03: Ka Khasi Student Union Laban Circle hynne ka sngi Palei, ka la leit buh da ka dorkhas ha u Principal CCF bad HOFF ka tnat Forest bad Environment ka sorkar jylla bah R. S. Gill, ba dawa weng noh mardor ia ki briew kiba sah be-ain ha Mahadev Khola.
Haba kren sha ki lad pathai khubor, u President ka KSU Laban Circle samla Ruben Najiar u la iathuh ba ka seng naduh 15 tarik Naitung ka la dep buh da ka dorkhas ha ba ia dei bad ka jingdon kiba sah be-ain bad ka jingdon ki jingtei be-ain ha Mahadev Khola.
Na ka liang jong u samla Ruben la ong ba ia ka jaka bala ai ha u snem 1923 ban shna ia ka Temple kan neh kumto kumba la ai, hynrei ia kiba la shan beain dei ban kyndang ia ki katkum ki kyndon ka ain, na ka liang jong ka tnad khlaw la ong ba ynda la ioh ia ka kaiphot yn sahong bad ka DC ban leh ia ka ain ynda la ioh ia ka kaiphot.
U samla Ruben u la iathuh ba haka jingshisha ka tnat Forest ka la leit ban jurip ia ka Mahadev Khola hynrei ki briew kiba sah ha kane ka jaka ki la applai ban pynkylla ia kane ka jaka kum ka jaka sah bad ban shna kum ki Guest House bad kiwei kiwei ki jingtei ban pyndonkam ma ki.
Halor kane u samla Ruben, u la iathuh ba ka seng ka pyrshah jur namar kine ki briew ki dei kiba sah be-ain bad kim don hok ban applai na ka tnat Forest ban pynkylla ia ka Mahadev Khola kum ka jaka sah ei jong ki bad dei namar kane ka KSU ka wan kynduh ia u Principal CCF bad HOFF ka tnat Forest bad Environment ban dawa ba ka tnat kam dei ban pdiang iaka jingkwah kine ki briew ban pynkylla jaka sah ha kane ka jaka. u samla Ruben.
U samla Ruben u la ong ba lada kine kiba sah be-ain ki ioh jaka sah ha Mahadev Khola, shen kin sa kam ruh ba ki dei ki trai ri trai muluk bad kan ai mynsiem ruh ia kiwei ki bar jylla ban wan kam trai ia katei ka jaka.
U la ong ruh ba Lada ka tnat Forest ka kloi shisha ban ai jaka ia ki bar jylla ba kiwei kiwei ki jylla ka dei ruh ban kloi ban ai jaka iaki Khasi bad lada ka tnat forest ka pynslem ban weng iaki ba sah be-ain na kane ka jaka naka liang ka KSU kan shim da ki sienjam jong la jong.
