Shillong, Iaiong 15: Ka Khasi Students’Union (KSU) ka pynpaw ia ka jingsngewsih halor ka jingshah leh bym suidniew ki sngi ba kyrpang jong ka Jaidbynriew Khasi kum ka Shad Suk Mynsiem, ka Pomblang Nongkrem, ka Behdeinkhlam, ka Seng Kut Snem bad ki lyngkhuh sngi iap jong ki riew khraw kum u Pa’iem Tirot Sing, u Woh Kiang Nangbah, u Sngap Sing Syiem, u Pa’iem Wickliffe Syiem bad u Myllung Soso Tham ha ka jylla Meghalaya khamtam ha ka thain jong ka Bri U Hynñiewtrep.
Naduh ki snem kiba mynshwa ka seng ka hap ban pyni da ki kam kum ban khang ia ki ophis, ki skul bad kiwei kiwei namar kane ka daw. Mynta ka sngi kaba dei ka Shad Suk Mynsiem jong ka Hima Mylliem la sakhi ba bun bha ki ophis Company, Agencies bad ki Banks ki la plie bad pynlong trei kaba pynduh lad ia ki paid Khasi ban shim bynta ha katei ka jingrakhe khamtam ia kito kiba dei ki nongbud jong ka Niam Tynrai bad Niam Tre khamtam haba kane ka sngi ka dei ka shuti na ka bynta ki ar district kata ka East Khasi Hills bad Ri Bhoi.
Kumta ki dkhot ka seng kim banse ban hap leit khang hi noh ia kine ki jaka ophis ha kine ki ar district khnang ba ki paradoh parasnam kin ioh ban ia shim bynta ha ka Shad Suk Mynsiem.
Ka KSU ka la shem ruh ba kiba bun ki banks ki khlem ai shuti dei tang namar ka daw ba ha ka Negotiable Instruments Act of Holidays for Banks ki khlem kynthup ia ka Shad Suk Mynsiem bad ka Pomblang Nongkrem kaba buh ia baroh kynthup ia ki nongtrei banks bad ki paidbah ha ka jingeh.
Kumta ka seng ka kyntu ia ki khlieh duh jong ki Banks bapher bapher ba kin shim khia ban ioh pynrung noh ia kitei ki ar sngi ha ka thup shuti khnang ba ki paradoh parasnam kiba trei ha ki banks kin ioh ban rakhe ia kitei ki sngi kyrpang ka Jaidbynriew.
Ha kaba ia dei pat bad ki companies ki riew shi met ka seng ka kyntu bad maham ba ki dei ban burom ia ki sngi kyrpang u Khasi lym kumta ka seng kam banse ban leh da bor. Ka KSU ka kyntu ruh ia ka sorkar jylla ba ka dei ban shim khia ban pynthikna ba kine ki sngi ki dei ban long ki shuti ba pura ia baroh ki ophis sorkar, jaka pule, banks bad ki company jong ki riew shimet.
Halor kitei ki jingeh ka seng kan sa pynbeit bad ki bor ba dei khmih khnang ban weng noh salonsar ia ki jingeh ba ki paradoh parasnam ki ba bud ia ka Niam Tynrai ki ju ia kynduh ha kum kitei ki sngi ba kyrpang.
Ka KSU mynshem snem ka la khang khyrdep ia katto katne tylli ki banks bad ki ophis kompeni shi met kiba la plie ha ka Good Friday bad mynta u snem ruh kan leh biang kumjuh bad kyntu ia baroh kine ki jait ophis ba ki dei ban khang ha ka Good Friday.
