Shillong, Nailar 22: U Myntri Khynnah ka Tnad Jal Shakti Dr Raj BhushanChoudhary u la leit sha South West Khasi Hills District ha Meghalaya mynta ka sngi ban peit ia ka jingpyntreikam bad ka jingseisoh jong ki skhim ka Sorkar Pdeng ha kane ka distrik.
Ia u Dr.Choudhary la leitsynran lang da u Bah ComingoneYmbon, Myntri ba dei khmih ia ka tnad Water Resource, uba la leitjngoh lang ia kine ki projek ba bei tyngka da ka Sorkar Pdeng.
Kine ki kynthup ia ka Hydro meteorological Station hapoh ka National Hydrology Project ha ka wahUmngi, ka Phodumtyngkoh – Phodtangjem Minor Irrigation Project ha ka shnong Rangmaw, ka Miyawaki Project ha Pyndenspar.
Ka AmritSarovar Project Phase- II ha ka shnong Sakwang, bad ka MGNREGA project ha PhotMawpon. U la leitjngoh ruh ia ka Flow Irrigation Project (FIP) ba la pyntreikam da ka tnad Water Resource ha PhotUmnew.
U Myntri u la peit ruh ia ka jingpyntreikam ia ki skhim bad u la iakynduh ia ki nongmihkhmat na ki tnad bapher bapher bad ka bor pyniaid distrik ha Circuit House, Mawkyrwat.
Ki ophisar na ka Community & Rural Development (DRDA), Integrated Child Development Scheme (ICDS), Public Health Engineering, Prime Ministers Employment Generation Programme (PMEGP), Public Works Department (Rds), Water Resources, Soil and Water Conservation Department, SarvaShikshaAbhiyan (SSA).
Tnad ka Koit ka khiah, Tnad ka rep ka riang, Tnad Horticulture bad MePDCL ki la batai bniah shaphang ki jingseisoh bad ki jingeh ha ka jingpyntreikam ia ki skhim ha kaba iadei bad ki tnad jong ki.
Ha ka jingiakren bad ki lad pathai khubor hangne, u Myntri u la ban jur halor ka jingpeit bniah ka Sorkar Pdeng bad ka jingphaikhmat kyrpang ban kyntiew ia ka thain shateilammihngi ha ki bynta bapher bapher.
“Ka la don ka jingpeit bniah ba kyrpang da u Myntri Rangbah Duh, Narendra Modi na ka bynta ka jingkyntiew ia ki jylla ka thain shateilammihngi, bad kumta, ki Myntri ka Sorkar Pdeng ki wan sha kane ka thain man ka lai taiew ban pynthikna ka jingpynsted ia ka jingpyntreikam ia ki prokram jong ka Sorkar Pdeng na ka bynta ka roi ka par.”
“Mynta ka sngi, nga la peit ia ka jingpyntreikam ia ki skhim jong ki tnad bapher bapher ha ryngkat ki ophisar jong ka bor pyniaid ia ka distrik. Ka jingpeit ka dei ia ka roi ka par ha ka jylla ha ki bynta bapher bapher bad hangno ka Meghalaya ka don haba ianujor bad kiwei kiwei ki jylla jong ka ri,” u la ong.
Hadien ba la leitjngohia kine ki projek, u Myntri u la leit ruh sha ka shnong Mawten bad Nonglang ban peit ia ka jingpyntreikam ia ka Greater Mawkyrwat Water Supply Scheme bad ka Nonglang Water Supply Scheme.
U la iakren bad katto katne ngut ki briew kiba ioh jingmyntoi na ki skhim ka Sorkar Pdeng kiba kynthup ka JalJeevan Mission bad u la hun ia ka jingpyntreikam ia kine ki skhim. U la kyntu ia ki bor pyniaid distrik ba kin pynthikna ba kito kiba dei ban ioh ia ki jingmyntoi na ki skhim ki ioh ia kane.
