Shillong Nohprah 18:Ha ka sien kaba nyngkong mynta ka sngi 17 tarik December 2012, u Bah John F Kharshiing, Co-Chairman, MIDC, Chairman, The Grand Council of Chiefs of Meghalaya, Ka Dorbar ki Khlieh Nongsynshar Ka Ri Hynniewtrep, bad Spokesperson, Federation of Khasi States, u la ioh ban iuh kjat hapoh ka office treikam jong ki Dolloi hapoh JHADC.
Ha kane ka jingialang u Bah John F Kharshiing, Chairman, Ka Dorbar Ki Khlieh Nongsynshar, u la pynshai halor ki kam kiba la iaid haduh kine ki sngi bad halor ki rai kiba la shim ha ka Dorbar kaba la long ha Shillong dang shen, ia kaba la pynshai bniah ia kita ki rai, ia kaba ki Dolloi ki la pynpaw ia ka jingkyrshan halor ki rai kiba ka Dorbar Hynniewtrep baroh kawei ka la dep rai.
U la pynsngew ha ki ba ka long kaba donkam ba kin long kiba la khreh ban lum ia ka Dorbar Ri ha ka por kaba lyngkot namar ki lah ban mih ki jingiakren pynbeit thymmai ia ki kyndon jong ka Sixth Schedule, bad shuh shuh kum shi bynta ban pynsngew sha ka Sorkar India halor ka jingdonkam ban pynkloi ia ka jingithuh ia ki Dorbar Synshar Shnong, Raid bad Dorbar Hima/Elaka ha kaba shai hapoh ka Constitution ka Ri India. Ha kaba iadei bad ka Dorbar Ri u Bah John Kharshiing, u la ong ba ki dang iai ap ia ka rai jong u Syiem bad Dorbar Ka Hima Khyrim halor kane ka kam.
Hadien ka jingialang u Bah John F Kharshiing, u la ia kynduh ruh ia u Bah L Sumer, MDC, CEM, u Bah Richard Lyngdoh, Executive Member, i/c Elaka etc., JHADC ban ai khublei ia ki halor ka jingshim khia jong ki ban mang kyrpang ia ki Dolloi ia ka karma trei kam hapoh JHADC. Ha kaba iadei bad kane ka bynta u CEM JHADC u la pyntip ba ha ka jingshisha ki dang iai ap ia ka mang tyngka na ka liang ka 13th Finance Commission ha kaba ki la buh ia ka bynta ban thaw ia ka iing office kaba kyrpang ia ki Dolloi ha ryngkat ki iing bishar (Court) na ka bynta jong ki. Ha kane ka jingialang ki la shim ia kine ki rai.
Ka Assembly Ka Dorbar Ki Dolloi, kaba kynthup ia ka Grand Council of Chiefs of Meghalaya; Federation of Khasi States, Dorbar ki Dolloi, bad ka Council of Nokmas, kaba la ia kynduh mynta ka sngi 14th December 2012, ha Shillong, hadien ka jingiatai kaba jan saw kynta ka la shim ia kine ki rai harum: –
Ban kyntu jur ia ka Sorkar India ban pynsted bad pynkloi ia ka jingpynbeit thymmai da kaba pynrung, bad ban pynpaw ha kaba shai ia ka jutang ki jingiateh bad ki jingkular (Instrument of Accession and Annexed Agreement) kiba la mynjur bad ia soi hapdeng ka Sorkar India bad ki arphew san Hima Khasi (Federation of Khasi States) ha ka 9th, 13th, 14th, August 1947 bad 17th August 1948.
Ban pynsngew ia ka sur jong ka iing baroh kawei, kaba la rai ban kyrpad ia u Syiem bad Dorbar Hima Khyrim ban pdiang ia ka jingtyrwa ban lum ka ka Emergent – Dorbar Ri (Peoples Parliament) ha Smit ha ka taiew ba khatduh jong u January lane taiew
Ban ai bor ha u Chairman bad saw ngut ki Khlieh Nonsynshar ban iakren bad ki bor KHADC ban long kiba la khreh ia ka jingpynbeit thymmai ia ka Sixth Schedule kaban sa long hashen.
Ban kyntu ia ka Sorkar Jylla ban mang kyrpang ia ka bhah na ka budget jong ka Sorkar Jylla sha ki 54 Hima /Elaka ha Khasi Hills, 19 Elaka ha Jaintia Hills bad na ka bynta ka Council of Nokmas kum shibynta ban kyrshan ban nang kyntiew ia ki iktiar jong ki ha ka ba ia dei bad ka synshar, khaddar, bad bishar ia ki Khun ki Hajar ha la ki Hima /Elaka.
Ban kyntu ia baroh ki seng sain pyrthei (political parties ) ha ka jylla Meghalaya bad ka Ri India ban kyrshan ia ka ‘The Constitution (One Hundred Seventeenth Amendment) Bill, 2012, kaban ai lad khlem pynwit ban don ka jingbhah kaba kyrpang ha kaba iadei bad ka jingpynkiew kam ia ki Scheduled Castes bad ki Scheduled Tribes (kaba la tip ruh kum ka ‘quota and reservation on Promotion Bill for Schedule Caste(Dalits) and ST)
Ban kyrshan ia ka jingdawa jong ki seng bhalang ia ka Sorkar Jylla ban wanrah ia ka ain Lokayukta Bill kaba shai bad kaba khlain kum shibynta ban ai ia u paidbah ia ka synshar khaddar kaba khuid ba suba hapoh ka jylla Meghalaya.
Ban kyntu ia baroh ki Hima /Elaka ban lum ia Dorbar ki Seng Samla Shnong hapoh la ki jong ki Hima.Kiba la poi bad don ha katei ka Dorbar Ki Dolloi ki long u R Moon Garod, Dolloi Nongbah, U Je Pyrtuh, Dolloi Amwi, u Risein Pan Dolloi Mynsoo, u Chui Pohlynjar, Dolloi Nongtalang, u Wenly Dhar, Dolloi Shangpung, u Erudith Sutnga, Dolloi Sutnga, u Chawas Lyngdoh, Dolloi Raliang, u K Comet Rymbai, Dolloi Jowai, u Manbha Kyndoh, Dolloi Narpuh, u Batskhem Lyngdoh, Dolloi Rymbai, u nongmihkhmat Dolloi Nongjngi, u Malding Amkhloo nongmihkhmat Dolloi Lakadong, bad u Nosmonlang Dkhar, Acting Chief Elaka Nongkhlieh, bad kiwei kiwei.(SP News)
