Shillong, Rymphang 23: Ka Shillong All Faiths Forum (SAFF) ha ka sngi saitjaiñ jong ka taiew bala dep ka la ïoh ban pynlong ïa ka jingia kynduhlang ha ka ban pynthymmai ïa ki nongkit kam jongka.
Hakane ka jingialang ki la pynpaw ruh ia ka jingsngew nguh ïa u Myntri ka Tnad Social Welfare bad kumjuh ruh ïa ka DREAM Mission ka ba la ai bynta ïa ka SAFF ha ka ban ïa khun pyrshah ïa ka jingjyllei ki jingdih pynbuaid ne u drok ha ka jylla.
Ha ka kyrwoh ba la phah da u General Secretary ka SAFF, Bah Noor Nongrum u la pyntip ba na ka liang ka kynhun ka pynpaw ka jingsngewnguh ïa ka tnad Social Welfare bad kumjuh ruh ïa u Myntri ka tnad u Bah Paul Lyngdoh halor ka jingialang kaba dang long shen na ka bynta ka jingiatreilang jong ki bad ki nongialam niam ha ka jingiakhun pyrshah ïa u drok ha ka Jylla .
“Ka SAFF ka don ïa ka jingshaniah ha ka sorkar lyngba ka ‘project’ jong ka Drug Rehabilitation, Elimination, and Action Mission (DREAM) hapoh ka jingialam jong u Mission Director Bah Francis G. Kharshiing bad kular ban ai ka jingkyrshan ba pura ha kaba ïakhun pyrshah ïa ki jingsniew ha ka imlang ka sahlang” u la ong.
Ka SAFF ka kyntu ïa baroh ki dkhot bad ki shnat trei kam ban pan jingiarap na ka sorkar ha kaban pynlong ïa ki prokram pynsngewthuh paidbah bad rehabilitation programs. Ka kynhun ka pynshlur ruh ïa ki jaka pule bad ki balang ban kin ai ka jingiatreilang bad ki riew shemphang khnang ba yn lah ban pyndonkam hok ïa ki lad ki lynti ha ka ban ïakhun pyrshah ïa u drok.
Ka SAFF ka la pynthikna ruh ban ai ka jingiatreilang, da kaba pynksan ïa ka jingdonkam ha ka jingiatreilang bad ka jingiatylli khnang ba yn lah ban tehlakam ïa ka jingma jong u drok ha ka imlang sahlang.
Ka SAFF ka la pynthymmai ruh ïa ki nongkit kam jong ka ha kaba u Bishop P Lyngdoh kum u President, Vice President Naba Bhattacharjee, General Secretary Bah Noor Nongrum, Assistant General Secretary Arup Barua, Treasurer Jasbir Singh and u Rev Kharkongor ‘Media assistant’.
