Shillong, Naitung 04: Ki paidbah ka Mawsynram Constituency mynta la jan man ka t
hliew iing kila sdang ban ioh kner ia ka jingiarap na ka kti u MLA jong ki u Bah Himalaya M Shangpliang hadien ba u la pyllait paidbah ia ka MLA scheme na ka bynta ban ai sha ki longiing kiba duk napdeng kiba duk tam.
Kane ka MLA scheme ba la pyllait paidbah kadei ia ka jingsam ia ki tin sop iing ha ka thain Lawbah ha ryngkat bad ka jingia don lang ryngkat bad ki nongialam jong ka Mawsynram Block Congress Committee (MBCC).
Na ka bynta ka thain Lawbah ki don haduh 40 tylli ki longiing kiba la ioh ia kane ka jingiarap na u MLA hadien ba ki Primary Unit jong ka Congress kiba don ha kane ka thain Lawbah kila jied ia ki longiing kiba duk napdeng kiba duk tam bad kine ki nongioh jingiarap ki ioh mar lai ban ki tin sop iing.
Ki shnong kiba hap hapoh jong ka thain Lawbah ki kynthup ia ka shnong Mawlyngba, Mawtepiew, Nonglait, Nongtrai, Sinai, Mawdon, Mawkhan bad kiwei kiwei de ki shnong.
Na ka liang jong u Bah Shangpliang u la pyntip ba na ka bynta ka Constituency hi baroh kawei kum u MLA u la mang haduh 1000 hajar ban ki tin na ka bynta ban sam sha ki paidbah kiba dei na ka long iing kaba duk kiba don hapoh jong ka Constituency.
U Bah Shangpliang u la pyntip ba ka jingjied ia kito ki ban ioh bynta um shem la leh da u MLA hynrei u la aiti ha ki nongialam jong ki area bad khamtam eh ha ki primary unit ba kin phah ia ki kyrteng kiba dei hok ban ioh ia kane ka jingiarap ha ka ophis trei kam jong u MLA ha Mawsynram.
Lyngba kane ka jingiarap ba ki ioh na u MLA kala long shisha ka jingkyrkhu na ka bynta kiba donkam kyrkieh ia kine ki tin.Kane kadei tang ka jingsdang ban pynpoi sha man la ki thliew iing ia ki kam pynroi bad nangne sha khmat kin dang bun ong u Bah Shangpliang.
Ha kajuh ka por u la pynpaw ba kito ki long iing kiba khlem ioh mynta ka kynti kim dei ban sngeweiei namar ba la shem snem yn sam biang biang ia ki tin bad kan sa dei sa ka pali ka jong phi ban ioh namar kiba la ioh mynta kin ym ioh shuh.
Shuh shuh u Bah Shangpliang u la iathuh ba hapoh jong ka Mawsynram Constituency ki don haduh 13 tylli ki area bad ki shnong kiba hap hapoh jong kine ki 13 tylli ki area kin ioh beit ia kane ka jingiarap.
Ha kane ka sngi la ia don lang u Bah Khelor Kharnaior uba dei u President jong ka MBCC, u Bah Rudy Shangpliang uba dei u working president ka MBCC bad ki riew rangbah jong ka dong ka thain.
