Shillong, Risaw 31: Ka Deputy Commissioner jong ka East Khasi Hills District ha dien ba kala ioh ia ka jingujor halor ka jingkiew ka dor jong u phan bad u piat mynta ka sngi kala phah ban jurip ban lap ia ka jingshisha halor kane ka jingkiew dor.
Ha kane ka jingleit jurip la shem ba katkum ki shallan ka dor jong u piat (a) ka long T.6500/- shi kwintal bad u piat (b) ka long T.7500/- shi kwintal na ka liang jong ka DC kala buh ia ka dor ba ka dor die khutia ia u piat (a) ka dei ban long T.70/- shi kilo bad ia u piat (b) ka dor ka dei ban long T.75/- shikilo.
Ha ia dei bad u phan ha kane ka jingjurip katkum ka dor shallan ka long T.4000/- tyngka shi kwintal, ka Deputy Commissioner kala buh ba ka dor die khutia ia u phan ha ka shi kilo kam dei ban long T.40/- bad kam dei ban tam ia ka T.50/- tyngka shikilo.
Ka DC Supply kala pynbna ba ki nongdie kim dei ban die palat ia katei ka dor ha kaba ia dei ia u phan bad u piat, katba ha kaba ia dei bad ki kjur la phah ia ki ophisar jong ka tnad rep ba kin tohkit.
