Shillong, iaiong 26: Ka Khasi Students’ Union, South Khasi Hills District Unit lyngba ka kyrwoh khubor ka jongka, ka la maham tyngeh ia ki nongwan jngoh kai sha ka Thaiñ Sohra hadien ba ka seng ka lah iohi bad ioh ia ki jingujor halor ka jingleh khlem akor, ka jingpynjakhlia bad pynlong ktem awria ha ki rud surok jong ka Surok Sohra- Shillong khamtam ha ki jaka ba sharum ka Jingkieng Duwan Sing Syiem.
Ka seng ruh ka maham ia ki nong wan jngoh kai khamtam ha ki sngi U Blei ki ba ju mlien ban pynlong ia kitei ki jaka kum ki ktem ban ia dih ki jingdih ba pynbuaid,ki jaka leh kam awria, ki jaka bret bilor bret plastic, ka ba pyni siadmet, pyn i lehraiñ, ka ba ialam bakla ruh ia ki khunlung khynnah, ki samla samhoi jong ka dong ka thaiñ Sohra bad ruh ka ba pynsyier ia ka leit ka wan jong ki briew ki ba iaid lyngba katei ka surok.
Shuh shuh ka seng ka maham ia kito ki briew ki ba ju mlien ban wan leh iathong pynher ia ki kali ar shaka ki jong ki, ka ba buh jingma ia ka jingshngaiñ ka leit ka wan bad ka ba lah ban poi ruh sha u pud ka jingsngewsih ia ki nongleit ki nongwan.
Ka seng ka kyntu ia ki nongjngohkai trai ri ka kin ri laka akor ka burom namar ka jingleh khlem akor ka jong ki jong lajong ka ai mynsiem ia ki nongwan jngoh kai na kiwei pat ki jylla.
Ka seng ruh ka ai bor ia baroh ki shnat trei kam ki ba hap hapoh ka jingpeit jingkhmih jong ka KSU Sout Khasi Hills District Unit ba kin long ki ba peit ngor bad leh ia ka ba donkam haba lap ia kum kitei ki jaid briew.
