Shillong, Iaiong 10: Mano ban mih khmat sha Lok Sabha na kane ka jylla Meghalaya yn rai ki paidbah la shai ka sngi. Baroh ki kyrtong kiba la tyrwa ia lade ha kane ka MP ilekshon ki don khyndai ngut, hyneiw ngut na 1-Shillong bad lai ngut na ka 2-Tura Parliamentary Constituency.
La shai ka sngi ki paidbah jong kane ka jylla Meghalaya kin sa ai ia ka rai mano ban long u nong mihkhmat na kane ka jylla sha dorbar bah jong ka Ri India sha Lok Sabha.
Ki nongthep vote hapoh jong ka jylla na ka bynta kine ki ar tylli ki MP Konstitwensi ki don 1914795 lak ngut, ki nongthep vote hapoh jong ka 1-Shillong Parliamentary ki don 1197806 lak ngut, katba ka 2-Tura MP Konstitwensi ka don 716989 lak ngut. Ki jaka thep vote baroh ki don 3167 tylli, ha 1-Shillong ki don 2053 tylli katba ka Tura ka don 1114 tylli.
