Shillong, Nailur 06 : Ka jingphriang ki khubor ba u nongai ktien ka BJP ba dei ruh u MLA barim ka Mawsynram Bah Himalaya Shangpliang ba un mih noh na ka BJP, ka la urlong ha kane ka sngi Balang hadien ba utei u nongmihkhmat barim u la phah ïa ka shithi iehnohkam jong u sha u President ka State BJP, Meghalaya.
Ha katei ka shithi iehnohkam, u Bah Hima u la kynnoh ba ka jingphet noh jong u na ka party BJP kadei namar ka don ka jingpeit shilliang khmat ha ka jingtreikam jong ka party ha Meghalaya hapoh ka jingïalam jong u Bah Ernest Mawrie.
“Watla nga kwah eh ban ïai neh bad shakri ïa ka party, hynrei nga sngewthuh ba katba dang don ka jingpeit shilliang khmat ha ki nongïalam hapoh ka jingïalam jong u State President kan buh jingeh bha ïa ki nongtrei ba shitrhem ka party ban trei na ka bynta ka jingkiew ka party,” u la ong.
Shuh shuh u ong ruh ba dei na katei ka daw kaba pynlong ïa u ban mih noh na ka jinglong dkhot ha ka BJP ha Meghalaya halor ki daw shimet. Utei u MLA barim u la ong ruh ba naduh ba u shah jied kum u nongai ktien ka BJP ryngkat bad kiwei pat ki MLA barim kiba pynïasoh sha ka party, u la ju rah bunsien ïa ki ishu jong ki paidbah lyngba ki lad pathai khubor ha kyrteng jong ka party.
La ong ruh ba u la trei shithrem ha kyrteng jong ka party kum u dkhot ba shah thung ban ïatai halor ka ishu kaba khluid bha jong ka Reservation Policy. Phet noh u Bah HM Shangpliang na ka BJP, “Hynrei ki don apt ki ishu kiba nga ju rah bunsien ha u State President kiba dei na ka bynta jingkiew jong ka party khamtam eh na bynta ka thain nongkyndong ryngkat ki jingai jingmut ban shim da kaba buh hakhmat ïa ka jinglong jingman jong ka party ha ka elekshon ba la dep ha Meghalaya,” u la ong.
Hynrei la ïathuh ba bunsien bha u la ju pynkynmaw ïa u State President halor ki mat ba la tyrwa ban leh ei ei ban pynkhlain ïa ka party ha ki lang baroh khamtam na ka jingdon ka thma pohiing hapoh ka party ha ka jylla.
Nalorkine, utei u nongmihkhmat barim ha ka shithi iehnoh kam u la pynpaw pat ka jingsngewnguh ïa ki nongïalam ka BJP kynthup naduh u Myntri Rangbah ka Assam, u Himanta Biswa Sarma, nangta u John Barla Myntri ka sorkar pdeng, Rituraj Sinha ba dei peit ïa ka Meghalaya, Bah Sanbor Shullai, Bah AL Hek bad kiwei kiwei ki nongïalam kiba la kyrshan ïa u ha ka por elekshon MLA ba dang shu dep.
Dang ha ki khyndiat sngi ba la dep, na ka liang u Symbud Myntri Rangbah ka jylla, Bah Sniawbhalang Dhar u la ai ksai ba ka don ka jingïakren na ka bynta ka jingkwah wan ïasoh NPP noh utei u rangbah.
