Shillong, Nailar 24: Mynta ka sngi ki pulit jong ka East Jaintia Hills District kila mynsaw haduh 9 ngut ha ka jingshah ther maw ha ki riew paidbah ha dein ba kala mih ka huri hura na ka jingpynlong ia ka jingsngap paidbah ha kaba ia dei bad ka jingpynheh ia ka jingpynmih dewbilat ka Meghalaya Cement Limited ha Thangskai.
Na ka liang jong ki pulit kila iathuh ba mynta ka sngi la pynlong ia ka jingsngap paidbah ban pynkiew ia ka jingpynmih dew bilat jong ka Meghalaya Cement Limited, ha shnong Thangskai na ka 2600 TPD kaba ia ryngkat bad 0.858 MTPA sha ka 4500 TPD kaba ia ryngkat bad ka 1.485 MTPA ka ba dei ruh 10 MW CPP bad 9.5 MW WHRS.
Ia kane ka jingpynlong ia ka jingsngap paidbah halor katei ka jingthmu la pynlong da ka Meghalaya State Polution Control Board ryngkat ki bor pyniaid ia ka District bad ki ophisar jong ka Meghalaya Cement Limited, namar ba ka don ka jingshah pynjot ka dara kaba la shna ban pynlong ia kane ka jingsnap la hap ban pynkynriah ia ka jaka ban pynlong ia ka jingsngap paidbah.
Haba la pynkynriah shawei ruh kine ki briew kila tur bad na ka jingleh jong ki la sngewthuh ba kin leh ia kaei kaei kaba lah ban pynmynsaw ia ki paidbah kiba wan sha katei ka jingsngap paidbah, na ka liang jong ki pulit kila pyndon kam ia ka bor jong ki tyngkat ka jingadakar ban pynpra ia ki briew kiba pynlong ia ka jingklumar.
Ki pulit kila antad ba kine ki riew paidbah kiba la wan ban pynkluamr ki don ha pdeng 100 bad 150 ngut ei ei, kine ki briew kila pynjot ia ka dara kaba la shna ban pynlong ia ka jingsangp paidbah bad ha ka juh ka por kila lynthaw bad pynjot ia ki shuki bala buh ban shong paidbah.
