Shillong, Rymphang 09: Mynta ka sngi ki riew sniew kiba ym pat lah ban tip kila mait ia u wei u rangbah u ba dei na ki thain Shella da ki wait katba u dang leit don kam sha Pyrkan.
Ki riew sniew kiba la eh ia kane ka kam runar la suba ba dei ki khar Bangladesh, kane ka jingjia kala jia sha ruh wah jong ka shnong Pyrkan kaba don sha shilliang jong ka wah Shella, ki briew kiba la ioh ia u ba mynsaw la pyntip sha ki pulit jong ka Shella.
Haba u SP News Agency u la ioh ban iakren bad ki pulit la iathuh ba kane ka jingjia kala jia mynta ka sngi ha rud ka wah Shella tang ba ka dei sha shilliang jong ka wah ha jan ka shnong Pyrkan. Ia une u rangbah la pynkit sha Shillong ban ioh ia ka jingsumar hynrei ia ka kyrteng ki khlem iathuh.
U Secretary Shnong Shella u bah Roykupar Synrem la iathuh ba ia u ba mynsaw la juh khot hapoh shnong kum u Bah Denglang Diengdoh.
