Shillong, Naiwieng 11: Mynta ka sngi la pynlong ia ka jingpynbam smai ia ki nongkti kam kiba thymmai jong ka seng Hynniewtrep Youth Council na ka bynta ka saimoi trei kam jongu snem 2023-2026, ha kaba u bah Peter J Lawai u pynbam smai ia u President u bah Roy Kupar Synrem bad ia ki dkhot baroh ha ka jignialang ba la pynlong ha iing dorbar Jaiaw Lumpyllon.
U nongialam bala shongthait noh jong ka seng Hynñiewtrep Youth Council (HYC) haba kren sha ki lad pthai khubor u la ong, Watla um dei shuh u nongialam ka seng hynrei ka thong kan iai neh ban shakri bad ban iada iaka bha ka miat ka jaidbynriew da kiwei pat ki lynti.
Ia kine ki kyntien u president barim ka HYC u Bah Robertjune Kharjahrin u la pynpaw ha ka jingialang pynskhem ia ki nongialam thymmai bad ki dkhot ka central executive committee (CEC) jong ka HYC ba la long mynta ka sngi ha Community Hall Jaiaw Lumpyllon.
Haba kren ha kane ka sngi u Bah Robert ula ong ba la seng ia ka HYC ban iada iaka jinglong kyrpang ka jaidbynriew bad ban khmih iaka bha ka miat ki paidbah bad ka jylla, ula ong ba iaka HYC la seng ban dawa pyntreikam iaka Inner Line Permit (ILP) bad ha ki snem bala dep ki don kiba artatien ia ka jingseng ia ka seng.
“Haki snem bala dep ki don kiba sngew artatien bala seng iaka HYC ban dawa iaka ILP hynrei mynta ngi lah ban ong ba haka kawei ngi la ioh ka jingjop namar mynta ka kynti baroh ki paidbad, ka Sorkar Jylla, ki sengbhalang bad wat ki sengsain pyrthei ki kwah ILP bad ka jingjop ba pura kan dei hadien baka Sorkar pdeng ka mynjur noh ban pyntreikam ILP ha Meghalaya” la ong u Bag Robert.
U Bah Robert ula ong ba ka Jylla ka donkam ki nongthaw aiñ ban thaw da ki ain bad ki Policy ban iada iaka jinglong kyrpang ka jaidbynriew bad ban khmih ia ka bha ka miat ki paidbah bad ka Jylla baroh kawei. U la ong ruh, Ka thong jong u kan iai neh ban iada ia ka jinglong kyrpang ka jaidbynriew bad ia kane ka thong un dang iai shakri bad iai leh da kiwei pat ki lynti bad ki lad.
