Shillong Nailur 06: U Chief Executive Member jong ka Khasi Hills Autonomous District Council u bah Titosstarwel Chyne u la pyntip ba u Lat ka jylla u Satya Pal Malik mynta ka sngi u la ai ia ka jingmynjur ia ka Khasi Hills Autonomous District (Regulation and Administration) of Land Bill 2021.
U CEM jong ka KHADC u la ong ba da kane ka jing ai jingmynjur jong u Lat ka jylla ia ka Khasi Hills Autonomous District (Regulation and Administration) of Land Bill 2021, mynta kala kylla long ka ain .
Haba kren sha ki lad pathai khubor, u la ong kane ka ain ka long kaba kongsan namar lyngba kane ka ain ka pynskhem ia ka jinglong trai ha ka hyndew ka shyiap ki trai muluk.
Lyngba kane ka Ain, la lah ban rejister ia ki jaka puta jong ki briew riewlum ne trai muluk bad ki bank, ki ophis sorkar, bad kiwei kin pdiang ia ki syrnod kiba ai u Syiem, ka Kur, Sordar, Rangbah Shnong kum ka jingpynshisha ka jingpynskhem ia ka jaka.
U CEM jong ka KHADC u la pynpaw iaka jingkmen ba ka Executive Committee (EC) bad ka Council hi baroh kawei, ba iaka Khasi Hills Autonomous District (Regulation and Administration of Land) Bill 2021 u lat ka jylla ula ai iaka jingmynjur ia ka Bill bad mynta kala long ka ian.
Ka Tnad District Council Affairs sha ka Printing Press jong ka Sorkar ban pynmih noh iaka Act jong ka Council. Ka long ka Bill kaban sah jingkynmaw haka histori jong ka District Council namar hadien 70 snem ba mynta la ioh iaka ain kaba ia dei bad ka jingbat khyndew.
Ka KHADC shen kan sa shna ia ki kyndon ban tehlakam ia ka jingshim bai thoh ha ka jingiadie iathied jaka ha ki shnong, ki raid, ne ki hima, ba kam dei shuh ban leh ne dain dor katba ki sngew mon.
Kan don ruh ka kyndon ba ki hima ne ki raid, ki shnong kin pyndonkam ia ki jaka na bynta ka jingbit ka jingdonkam jong ki nongshong shnong, ym ban die pathar shano shano.U la ong ba baroh shi katta, la ju ong ba ka District Council ka dei ka nongpeit ia ka khyndew ka shyiap hynrei ym don ka bor bad dei tad haduh mynta ka kynti ba ka la urlong.
Ka Council ka ju leh ban buh tang ia ka jingbuh bui ia ki jaka puta, iaka syrnot ba ki ai haba ia dei bad ki jaka kam long kaba shngian ha kaba ki Bank, ne kino kino ki kynhun kim pdiang ia ki kot ki sla kiba la ai da ka KHADC.
U CEM la ong ba da ka jingioh ia kane ka ain, mynta baroh ki kot jaka, ia kaba katkum kane ka Bill la ai bor ia ka Kur, ki Rangbah Shnong, u Syiem ki lah ban ai ia kano kano ka kot pynskhem jaka ia kaban ithuh da kino kino ki kynhun ne da ki Bank bad kino kino ki bor sorkar kin hap ban ithuh ia ki kot jaka kiba ai da ka District Council.
La ong ba ia ki dulir ba la ai, dei ban phah ia ka jingthoh sha ka KHADC, u la bynrap. Hynrei ha kajuh ka por, u la ong ba ki Elaka, ki Raid kin shah bishar lada ai syrnod kulmar bad yn tehlakam ia ka jingdie jaka ban shim pisa. Ha kajuh ka por, u CEM u la ong ba ka shong pat ha ki trai jaka lada ki kwah ban rejister ha District Council ne ha ka tnat Revenue ka sorkar jylla.
