Mairang, Nohprah 02: Ka ophis jong ka District Social Welfare Officer, West Khasi Hills District hynne ka sngi ka la ioh ban pynlong ia ka jingrakhe ia ka ‘International Day for Persons With Disability (PWDs)’ kaba long ka sngi kaba kyrpang jong ki nongshong shnong kiba don jingduna ha ki dkhot met.
Ka jingrakhe ia kane ka sngi la pynlong ha Tirot Sing Memorial Hall, Pyndengumiong, Mairang, Eastern West Khasi Hills District ha kaba u Deputy Commissioner jong ka Eastern West Khasi Hills District, u Bah W. Nongsiej ula leit kum u kongsan.
Ha kane ka sngi la don ryngkat ka jingdon lang jong ka District Social Welfare Officer ka West Khasi Hills District, ka Kong V.C War, ka Principal ka Mairang Vidya Jyoti Inclusive School, Mairang, ka Kong B.L Mawnai, u Director ka Makarious Medical Centre, Mairang, u Dr. M. Syiem bad kiwei kiwei.
Ha ka jingkren ka jong u kum u kongsan, u Deputy Commissioner ka Eastern West Khasi Hills District, u Bah W. Nongsiej ula ai khublei ia ka ophis jong ka District Social Welfare Officer ka West Khasi Hills District ba ka la lah ban pynlong ia ka jingrakhe ia kane ka sngi kaba kyrpang.
na ka liang u Deputy Commisioner u la kyntu ia baroh kiba la sakhi lang ia kane ka prokram ba kin peit bad ithuh ia ki nongshong shnong kiba don jingduna ha ki dkhot met lyngba ki sap ba kyrpang jongki ym lyngba ki jingduna kiba ki don.
Katba, u Director ka Makarious Medical Centre, Mairang, u Dr. M. Syiem ha ka jingkren ka jong u ula khot la wer ia baroh ba kin don ia ka mynsiem jong ka jingsngewlem na ka bynta ki nongshongshnong kiba don jingduna ha ki dkhot met bad u la kyntu ruh ia baroh ba kin wanrah ia ka jingkylla ha ka sainpyrkhat da kaba phaikhmat sha ka jinglah jong kito kiba don jingduna ha ki dkhot met lyngba ki sap ki talent ba u Blei ula ai haki.
Ha kane ka sngi la sakhi ruh ia ka medical check-up, ka jingpynrung kyrteng aadhar bad la ioh ruh ban pynlong ia ki jingialehkai bapher bapher na ka bynta ki nongshongshnong ka thain kiba don jingduna ha ki dkhot met.
Ha kane ka jingrakhe, ki kynrem ki lyndan kila ioh ruh ban sam iaki tiar bad kor iarap sha kiba don jingduna ha ki dkhot met kiba la wan iashimbynta ha kane ka prokram.
