Shillong, Iaiong 21: U Symbut myntri rangbah ka jylla u bah Prestone Tynsong u la iathuh ba mynta ka sngi la test COVID-19 Positive 192 ngut ha ka jylla baroh kawei bad kiba dang shitom na kane ka jingpang ha ka jylla baroh kawei ki long 1021 ngut haduh mynta.
Haba kren ha ki lat pathai khubor u Symbut Myntri Rangbah ka jylla u bah Prestone Tynsong u la iathuh ba ha ka jingialang kaba la long mynta ka sngi ka sorkar kala shim ia ka rai ba baroh kiba wan sha ka jylla ki dei ban pynia ia syrnot kaba dei jong ka RTPCR ym da kiwei pat ki jaid jingtest.
Ka sorkar baroh shi katta kala shah ia ki briew kiba dei na kiwei ki jylla ka thain shatei lam mih ngi jong ka Ri India ba kin leh ia ka test da ka RAT, hynrei naduh mynta ka sngi ka sorkar kala shim ia ka rai ban dei ban leh da ka RTPCR ia baroh kiba wan sha ka jylla.
Ha ka juh ka por ka sorkar kala buh ka jingkyrpad ia ki briew kiba don sha bar ka jylla ba kim pat dei ban wan phai namar ka jingkiew sted kane ka jingpang COVID-19 ha kane ka nongbah Shillong bad ia kito kiba shitom lada long kaba lah ba kim dei ban wan sha Shillong.
Haba ia dei bad ki jaka pule bad ki Kolej ha kane ka nongbah Shillong kim khang haduh ka 3rd Jymmang 2021, lait noh kito ki jaka ba don ki jaka toh eksamin kin plie bad ia ka eksamin kin iaid beit bad ki Kolej ki dei ban pynlong da ka Online Klas.
Ha kane ka nongbah Shillong ka sorkar kala shim ia ka rai ba kin khang noh ia ki jaka khap sniuh, ki jaka pynbha briew, ki jaka jngi, ki jaka pyni baiskop, ki jaka iadih kyiad, ki Restaurant, ki iing basa kin khang naduh ka 23 tarik haduh ka 30 tarik mynta u bnai Iaiong.
Ki dukan ki bym dei kiba die ia ki mar ba don kam kin khang naduh ka 26/4/2021 bad ia ki nongtrei sorkar la shah ba kin wan trei tang 33%.
