Shillong, Iaiong 09: Mynta ka sngi la thang donburom ia u Rangbah Sumar Sing Sawian ha jaka thang briew ha Jaiaw, Shillong katkum ka riti dustur leh niam ka niam Khasi ha kaba bunbah nalor kiba ha iing ha sem la don lang ki paralok parajor ban pyndon burom khat duh ia u tei u khraw pyrkhat ha ka jaidbynriew Khasi.
Ia ka jinglehniam la pyndep ha iing sah ha Labansaro ha Umroi bad ha dien kata la wan ia ka met sha Shillong ban pyndep ia ka thang katkum ka niam Khasi ha jingthang briew ha Jaiaw Shillong ha ka por nohphai sngi ha kaba ia ka niam ka rukom la pyndep da ki rangbah ki san.
Ha kane ka sngi na ka liang jong ka seng Khasi Kmie la leit ban mih khmat da u bah O Pyngrope symbut President ka seng Khasi Kmie ha kaba u la ai ia ka jingkren sngewlem bad ia u la synranglang da u bah Paia B Synrem Assistant general secretary Seng Khasi Kmie.
Kum ban pynkynmaw u bah Sumar Sing Sawian u long u nongthoh khubor ba la don ha kane ka kam naduh ka por ba dang sdang ka jingiakhih ban ioh iala ka jylla pura bad u la don ha ka lat pathai khubor Press Trust ka India, ha dien ba la shong thiat na katei ka kam u la bat ruh ia ka kam Editor ha ka kot khubor phareng Apphira bad kiwei kiwei ki lat thoh khubor.
U la long ruh u rangbah ba paw ha ka jylla u la thoh bun ki kot, la ong ba uwei na ki nongialam rangbah ba ha khmat eh ha ka seng Khasi Kmie bad ka sorkar ruh kala burom ia u da kaba pynkup ia ka burom Meghalaya Day Award.
