Shillong, Risaw 06: Ka Khasi Hills Autonomous District Council kum shi bynta ban pynsngew thuh shai ia ki nongialam shnong, mynta ka sngi ka 6 tarik u Risaw kala lum ia ki Rangbah Shnong na sor bad khap sor na ka bynta ban pynshai halor ka Land Act, ka Solid Waste Management Act bad kumjuh ruh halor ka Building bye law.
Ia kane ka jingialang na ka liang jong u Bah Pynshngain N Syiem uba dei u Deputy Chief Executive Member bad u Bah Teibor Pathaw uba dei u Executive Member ba peit ia ka tnad Land kila lum ka jingialang ha pinewood, ha kaba da ki spah ngut ki rangbah shnong kila poi sha katei ka jingialang.
Haba ia kren bad ki lad pathai khubor hadien ka jingialang u Bah Teibor Pathaw u la pynpaw ba halor ka jingkwah jong ka sorkar India na ka bynta ban pyntrei kam noh ia ka Digitalisation of Land Record ka ban pynsuk ia ki paidbah ha kaba iadei bad ki kam jaka puta.
Kumta kila lum lang ia kane ka jingialang ban pynshai sha ki rangbah shnong, la ong u bah Teibor u la iathuh ba kiba bun ki briew ki wan sha ka Council na ka bynta ban shim ia ka land record.
U Bah Teibor u la iathuh ruh ba jingpyntrei kam ia ka Digitalisation of Land Record kadei ka jingkwah jong ka sorkar India n aka bynta ban pynbeit ia kiba bun ki bynta ha kaba iadei bad ki land record bad kane kan pynsuk shibun eh ia ki paidbah.U Bah Teibor u la iathuh ruh ba dei ka high court kaba la bthah ia ka KHADC na ka bynta ban pyntrei kam ia ka Digitalisation.
Na ka liang Bah Pynshngain N Syiem haba kren bad ki lad pathai khubor u la pynpaw ba ka bai thoh jaka ha kine ki sngi baroh kiba la leit noh ka long klumar namar ba don kiba shim ha ka dor barit bad don kiba shim ha ka dor kaba heh bad da ka jingdon jong ka land rule la buh ryntih noh ia ka dor bai thoh jaka.
