Shillong, Risaw 01: Ki nonghikai SSA ki ba hap hapoh ka shatri jong la All Meghalaya SSA School Teacher Association (AMSSATA) mynta ka sngi jong ka 01 tarik u Risaw 2024,ki la pynlong da ka jingiakhih da kaba shong kyllain mungor ha madan malki.
Ka jingshongiakhih ki nonghikai mynta ka sngi ka long ban dawa na ka sorkar jylla ban kyntiew noh ia ka tulop jongki da 100 per cent. Ki nonghikai kin pynlong ia kane ka jingiakhih ka ba khlem buh por.
Ha ka jingiakren bad ki nongthoh khubor na ka liang u bah P Thyrniang u la ong ba ha ka jingsynshar kiwei pat ki sorkar ha ki snem ba la dep ia ka tulop jong ki nonghikai la ju pynkiew man ka lai snem lane man ka saw snem, hynrei mar shu synshar kane ka sorkar ba mynta kam pat shem la don ban pynkiew ia ka tulop kata na duh u snem 2008, 2010 bad ha u snem 2016.
U la ong ruh ba ka sien ka ba khayduh eh ba ki pynkiew ia ka tulop kadei myn ha u snem 2016. Kumta na ka liang ki nonghikai SSA ki la rai ban pynlong ia kane ka jingiakhih ba khlem buh por tad haduh ba ka sorkar kan da sngap ia ka jingdawa jong ki.
U bah Thyrniang u la ong ba ngi la rai skhem ba ngin nym sangeh ia kane ka jingiakhih da kaha shong kyllain mungor ha madan malki kat bym pat ioh ia u soh jong ka jingjop, ha ka ba ka sorkar kadei ban pynkiew ia ka tulop jong ngi bad ruh ba ka sorkar kadei ban ai da ka jingthoh lada ka pynkiew ia ka tulop hynrei ban shu iakren ngin nym pdiang iakata.
