Shillong, Naitung 24: Ka tnad ba kyrpang jong ki pulit ban ialeh pyrshah ia ki kam khaii drok ha kane ka nongbah Shillong kala ioh ban kem ia kawei ka long kmie Manipur na Madanriting ha ka sngi baar bad na ka la ioh ban kurup haduh 500.29 grams u drok bala tip kum u Herion.
Haba kren ha ki lad pathai khubor ka Superintendent ki pulit jong ka East Khasi Hills District ka kong C Lyngwa kala ong ba kane ka long ka jingioh kem kaba heh tam ha East Khasi Hills mynta u snem. Na ka liang jong ki pulit kila rah ia ka sha iing bishar katkum ki kyndon jong ka ain.
Ka heh jong ki pulit jong ka East Khasi Hills District kong Lyngwa kala ong ban ia leh pyrshah ia kane ka jingsniew kam dei shuh tang jong ki pulit hynrei kala don ruh ka kamram jong ki paidbah ha ka imlang sah lang. Ka jingiakhun pyrshah ia u drok ha kane ka nongbah Shillong ka long kum ka thma.
Ha ka juh ka por ka kong Lyngwa kala pynpaw ia ka jingsngewdiaw namar ba don katto katne ki dong kim treh ban ia treilang bad ki pulit ha kaba ia dei bad kane ka jingleh pyrshah ia u Drok kaei kaba la jia mynnin kala shim por ia ki pulit haduh lai kynta shiteng ban pyndep ia ka kam ban kmen namar ba ym mano mano ban wan sha khmat ban long ki nongsakhi.
Katkum ka ain NDPS Act,ka kren shai ba ki pulit kim lah ban kem khlem da don ki nongsakhi, na ka liang jong ka SP jong ka East Khasi Hills kala pynpaw ba lada kum ki paidbah ki don ka jingsngewkhia ia kane ka kam, ka kyntu ban ki dei ban wan ha khmat ban iarap ia ki pulit ban ialeh pyrshah ia kane ka jingsniew kaba la rung mynta ha jan man ki thiew iing ha kane ka nongbah Shillong.
Ki jaka kiba la shah ktah eh mynta ha kane ka nongbah Shillongm ki long ma Madanriting, Mawlai, Jaiaw, mawprem, Jhalupara, Mawiong, Polo, Nongmynsong bad bun bah ki dong bad ki kyntoi ha kane ka nongbah Shillong. Na liang jong ki pulit mynta kin nym kem shuh tang ia ki nongdei hynrei wat ia ki trai iing ba aiwai ing ruh kin kem lang noh ha kaba ia dei bad kane ka jingialeh pyrshah ia u drok, la ong ka SP kong Lyngwa.
