Shillong, Nailar 12: Ka Khusnam Sahkynmaw ia ka Crystal Gayle Kharnaior la pynlong ha paki dulan jong u Lat, ha Raj Bhavan ha ka ba u Lat, Phagu Chauhan, u long u kongsan ha ryngkat ba iadon lang u bah Paul Lyngdoh, Myntri Mattithaw bad Deiriti.
Ha ka jingkren jong u Lat u la kynthoh ba dei ban don ka shlem ka ba shngaiñ na ka bynta ki barikor ba kin kyrsoi ia la ki sap tynrai bad ka sorkar ka dei ban kyrshan ia ki jingpyrshang jong ka synjuk Riti Academy.
U la ban jur ruh ba ki iktiar sorkar kmie ki lah ban theh ki jingiarap lada ka don ka jingtreilang na jylla da baroh ki briew naduh ki kynrem lyndan haduh ki riew paidbah. Ia ka Khusnam Sahkynmaw ia ka Crystal Gayle Kharnaior 2023 la ainam sha u Bah Ian Lyngdoh Nongkynrih.
Ka jingai ia kane ka khusnam sha u tei u rangbah ka long na ka bynta ka kot ka ba u thoh halor ki jingkieng jri sha Ri-War ki ba u la shem da ki spah tylli bad halor ka durim TV Shisngi Ha La Shnong (A day in the village) ba ju pyni barabor da ka Doordarshan Kendra. La ñiewkor shikatdei ia kine ki kam bakhraw jong u Bah Ian Lyngdoh Nongkynrih bad la bishar ba u donhok ban ioh ia kata ka nam ka burom.
Kum shi bynta na ka jingrakhe sam khusnam, la pynbna paidbah ruh da u Bah Raphael Warjri, Khliehduh jong ka Synjuk Riti Academy ban kyntiewnam da ka Khusnam Sahkynmaw halor ki akhia rangbah ba dang shu khlad dang shen u Waheh S Quotient Sumer Award bad Rangbah Sumar Sing Sawian.
Kum ka dak jong ka burom na ka bynta ka longiing longsem jong kita ki longiing la pynkup burom ia ka kong Bijoya Sawian na ka liang ka longing longsem ki kur Sawian, na ka bynta ba la kubur ia ka khusnam halor u Rangabah Sumar Sing Sawian bad ia ka Kmie ki khun Riwotki Laloo, bad u khun rangbah Riquoma Rq Laloo na ka liang ka longiing longsem jong u Waheh S Quotient Sumer ba ki la kubur halor ka khusnam sahkynmaw.
Lah ban pynkynmaw ba u Waheh S Quotient Sumer, u dei u radbah nongthoh bad u simpah simsong u ba khraw ka jingtip shaphang u Kiang Nangbah bad u ba la long teng u dkhot jong ka Sahitya Akademi.
Ia kine ki khusnam sahkynmaw ban kyntiewnam ia kita ki radbah jong ka thoh ka tar bad ka deiriti, la khmih lynti ban sa sdang naduh ka lyngkhuh snem ba nyngkong jong ki ban iai pyrto ia ki synñiang bakhraw ba ki la thehsei ha ka imlang sahlang.
