Shillong, Naitung 24: Mynta ka sngi u Lat ka jylla u Phagu Chauhan u la ia kynduh ia ka kynhun kaba la ialam da Dr. K C Boro MLA barim ba dei ruh u myntri ka barim ka sorkar Meghalaya bad ha kane ka jingiakynduh la ia kren halor ka jingshishah thombor ki ar ngut ki khynnah ha 16/Iaiong/2024 ha South West Garo Hills District.
Ha kane ka jingia kynduh la don lang ki long kmie na ka seng Meghalaya Koch Women Welfare Association (MKWWA), ha kane ka jingiakren u Dr. Boro u la pynpaw ia ka jingsngewsih halor kane ka jingjia bad ha kane ka jingkynduh kila ai a dorkhas ha u Lat ka jylla.
Ha kane ka jingiakynduh kila pynpaw ia ka jingdawa ban ioh jingiarap T.10 lak tyngka lyngba ka skhim Victom Compensation Scheme 2022. Halor kane u Lat ka jylla u shah skhor bad u la ai ka jingkular ban peit ba kiba la shah thombor kim ioh ia ka hok jong ki.
Kum ka dak jong ka jingiakyrshan lem na ka liang jong u Lat ka jylla u la pynbna ban ai jingiarap pisa T.50000/- tyngka na ka pla jingiarap kaba u lat ka jylla u don bala tip kum ka Discretionary Grant sha kiba la mat ia katei ka jingshah thombor.
U Lat ka jylla u la ban jur ba ka long kaba kongsan ban pynioh ia ka jingshong suk shongshngian ki paidbah nongshong shnong, khatam ki kynthei khynnah bad la don kam ban shim ia ki ain kiba kham khlain ban iada ia kum kine ki jingjia, u la ai ka jingkular ba un sa ia kren bad ki bor ba dei ia kane ka kam.
