New Delhi, Jylliew 23: Naka “PM CARES Fund Trust” ka lah mang ia ka jingpynpoi haduh 50,000 tylli ki ventilator ba shna hi hapoh ri ban ai sha ki COVID hospital kiba pyniaid da ka Sorkar ha baroh ki Jylla bad ki UT bad la mang ruh T.1000 klur na ka bynta ka bha ka miat jong ki nongbylla kiba wan nabar.
Na kine ki 50,000 tylli ki ventilator, 30,000 lah shna da ka M/s Bharat Electronics Limited. Ia ki 20,000 tylli ba tam la shna da ka AgVa Healthcare (10000), AMTZ Basic (5650), AMTZ High End (4000) bad Allied Medical (350).
Haduh mynta lah dep shna 2923 tylli ki ventilator bad na kine, lah dep pynpoi 1340 tylli ki ventilator sha ki Jylla bad ki UT. Kito kiba lah ioh ia kine ki ventilator ki kynthup ka Maharashtra (275), Delhi (275), Gujarat (175), Bihar (100), Karnataka (90), Rajasthan (75). Katba yn da kut u bnai Jylliew 2020, yn sam sa 14,000 tylli ki ventilator sha baroh ki Jylla bad ki UT.
Ka sorkar pdeng kala pyllait T. 1000 klur sha ki Jylla bad ki UT na ka bynta ka jingbha jong ki nongbylla kiba wan na kiwei ki jaka. Ia ka jingsam ia kane ka jingiarap tyngka lah buh nongrim ha ka formula 50% ka jingdon briew katkum ka census 2011, 40% na ka jingbun ki nongpang COVID-19 bad 10% na ka bynta ka jingiasam ba iaryngkat hapdeng baroh ki Jylla bad ki UT.
Ia kane ka jingiarap pisa yn pyndonkam na ka bynta ka jingpynbiang jaka sah, ka bam, ka jingai jingsumar bad ka jingleit jingwan jong kine ki nongbylla ba nabar. Kiba lah ioh ia kane ka jingiarap pisa ki kynthup ka Maharashtra (181 cr), Uttar Pradesh (103 cr), Tamil Nadu (83 cr), Gujarat (66 cr), Delhi (55 cr), West Bengal (53 cr), Bihar (51 cr), Madhya Pradesh (50 cr), Rajasthan (50 cr) bad Karnataka (34 cr).
