Shillong, Nailar 28: U Symbut myntri rangbah ka jylla u bah Prestone Tynsong ba dei peit ia ka tnad shna surok, haba jubab ia ka jingkylli jong u bah Reniktone Lyngdoh Tongkhar ia ka surok na Photjaud sha Mawbidong lyngba ka Tyrnai, la ong ba ia kane ka surok yn sa shna lyngba ka skhim PMGSY – III.
Haba jubab ia ki jingkylli bynrap la ong ba kane ka surok kala rung ha katei ka skhim bad kaba sah mynta ka long sa tang ban ioh ia ka jingmang pisa na ka tnad pynroi nongkyndong ka sorkar pdeng mar ia ioh ia ka jingmang pisa yn sa khot tender noh ban sdang ia ka jingtrei.
U bah Prestone u la pyntip hapoh ka ing dorbar ba ka sorkar pdeng ha kane ka PMGSY-II bad PMGSY-III, kala pynpyrkhing bha ia ki kyndon hynrei da ka jingshim khia u myntri rangbah ka jylla ban ia kren bad ka sorkar pdeng la pynjynsur ia ki kyndon.
La iathuh ba kano kano ka shnong kaba la don 250 ngut ki nongshong shnong ki la don ia ka hok ban ioh surok lynggba kane ka skhim PMGSY, la iathuh hapoh ka iing dorbar ba na ka skhim PMGSY-II ka jylla kala ioh ban shna 400 km ka surok.
Ha kane ka PMGSY-III ka sorkar Meghalaya kan ioh ban shna 600 km, haba khein lang ka jylla mynta u snem mang tyngka 2024-2025 kan ioh 1250 km bad kane ka dei ka thong kaba ka sorkar pdeng kala buh ba ka kylla Meghalaya kan pyndep.
