New Delhi, K.Lyngkot 25: Ka sorkar pdeng kala pynbna mynta ka sngi ia ki 126 ngut ki nongioh ia ka khusnam Padma Awards 2022 bad kane ka jylla Meghalaya ka Dr Badaplin War kala shah jied ban ioh ia kane ka khusnam na ka liang ka pule puthi bad ka thoh ka tar.
Ki Khusnam Padma Award – kiba long ki khusnam kiba heh tam na ka bynta ki riew shimet jong ka ri, ki dei ba ai ha ki lai bynta kiba long ka Padma Vibhushan, Padma Bhushan bad Padma Shri.
La ai ia kine ki khusnam na ka bynta ki kam bapher bapher kum ka jingsindur, ki kam na ka bynta ka imlang sahlang, ki kam kiba iadei bad ki paidbah, ka science bad engineering, ka kam khaii bad ki karkhana, ki kam ba iadei bad ki dawai, ki jingthoh bad ka pule puthi, ki kam ialehkai, ki kam jong ki ophisar bad kiwei kiwei.
Ia ka khusnam ‘Padma Vibhushan’ la ai na ka bynta ka jingshakri kaba bha; ka ‘Padma Bhushan’ ka dei na ka bynta ka jinshakri kaba khraw bad ka ‘Padma Shri’ ka dei na ka bynta ka jingshakri ha kanokano ka kam. Ka ju don ka jingpynbna ia kine ki khusnam man u snem ha ka Republic Day.
U President ka India u ju ai ia kine ki khusnam ha ka jingialang kaba long ha RashtrapatiBhawan ha u bnai Lber lane Iaiong man u snem. Mynta u snem, u President u la ai jingbit na ka bynta ka jingai 128 tylli ki khusnam Padma kaba kynthup ar tylli ki khusnam na ka bynta ar ngut ki briew ha kum kane, ki jukhein ba kane ka dei kawei ka khusnam katkum kane ka thupharum.
Kane ka thup ka kynthup 4 tylli ki Padma Vibhushan, 17 tylli ki Padma Bhushan bad 107 tylli ki Padma Shri. 34 ngut na kito kiba ioh ia kine ki khusnam ki dei ki longkmie bad ka thup ka kynthup ruh 10 ngut ki briew kiba nabar ri, NRI, PIO, OCI bad 13 tylli ki khusnam ki dei na ka bynta kito kiba la khlad noh.
