Shillong, Nailar 15: Pynkhreh Ka jylla Meghalaya ban pynlong ia ki tamasa bapher bapher ki ban sdang naduh ka 12 tarik u Risaw da ka jingthmu ban ialeh ban kyntiew ia ka kam jngohkai bad ban khring ia ki nongwankai suwari ha ka jylla baroh kawei.
Ia kane la pyntip da u Myntri ka tnad ka kam Jngohkai u Bah Paul Lyngdoh u la ong, Ki tamasa bapher bapher yn sa pynlong ha kylleng ki bynta jong ka jylla ban rah shajrong ia ka dur ka dar jong ka jylla Meghalaya kum kata ka jaka kaba biang tam hapoh ka ri na ka bynta ki nongjngohkai pyrthei.
U bah Paul Lyngdoh u la iathuh ba, yn sdang ia kane ka tamasa da kaba pynlong iaka Megha Kayak Fest kaba lai sngi haka 12 haduh 14 tarik u Risaw ha Shnong Umtham, Ri Bhoi District hadien kane yn pynlong ia ka Shillong Literary Festival kaba lai sngi ha nongbah Shillong naduh ka 14 haduh 16 tarik u Naiwieng.
U la ong ba ia ka Shillong Cherry Blossom Festival, kaba dei ka tamasa kaba khring bha ia ki paidbah ha ki snem ba la dep, yn pynlong ha ka 17 haduh 19 tarik u Naiwieng bad mynta ka kynti ia kane ka tamasa yn pynlong ha Ri Bhoi District.
Ha u snem ba la dep, ia katei ka tamasa la la hap ban pynsangeh noh namar ka jingdon ka jingjia ha ka shnong Mukroh ha kaba 6 ngut ki briew kila shah siat iap ha kaba 5 ngut ki dei na Meghalaya bad uwei u Forest Guard ka Assam.
Shuh shuh u Bah Jason u la iathuh ruhamar ka jingpynsangeh noh ia katei ka tamasa, u Nongpyniaid ia katei ka tamasa u Bah Jason Manner ula iathuh ba kila dep ban die ia ki 12000 tylli ki tiket ha ka shi sngi bad la khmih lynti ba kin don haduh palat 60,000 ngut ki briew ki ban wan sha ka jylla.
la iathuh ruh ba la dep ban pynphai biang iaka pisa kaba kot T.1.25 Klur sha ki paidbah kiba la thied ia ki tiket bad la lah ban pyndep lut ia kane ha u bnai Kyllalyngkot 2023, ka jingduhnong ki nongpyniaid ia katei ka tamasa ka la kot sha ka T.3.6 Klur namar ka jingpynsangeh noh ia ka tamasa.
