Shillong, Rymphang 27: Ki 29 ngut ki MDC jong ka Khasi Hill Autonomous District Council kiba dang shu shah jied na ka bynta ka samoi 2025 – 2029 kila shah pynbam smai ha ka Deputy Commissioner ka East Khasi Hills District kaba la long hapoh ka ïing dorbar jong ka KHADC Hall.
Napdeng kine ki 29 ngut ki MDC, dei tang u MDC ka Sohra u Bah Titos W Chyne uba la shim ia ka jingbam smai da ka ktien Khasi katba baroh ki MDC kila bam smai da ka ktien phareng.
Ia kane ka jingialang pynbam smai ia ki dkhot ba thymmai jong ka KHADC kiba dang shu shah jied la pynbam smai da ka kong RM Kurbah kaba dei ka Presiding officer ha kajuh ka por kaba dei ruh ka DC jong ka EKHD.
Ha kane ka sngi ba bam smai ki MDC la wan ban sakhi lang ruh da ki MLA kiba kynthup na ka Party VPP bad kumjuh ruh na ka UDP ha ryngkat bad kiba ha ïing ha sem jong ki MDC lem bad ki nongkyrshan jong ki.
Hadien ba la dep jingbam smai ki MDC, ka kong RM Kurbah kaba dei ka Presiding officer kala pynbna ba ha ka 28 tarik u Rymphang ha ka por 11 baje kan don ka election ban jied ia u Chairman ba thymmai jong ka Council ia kaba yn pyniaid hi da ka DC bad ha ka por 2 baje kan don ka election ban jied ia u CEM ba thymmai ka council hapoh ka jingpyniaid u Chairman ba thymmai.
U Bah Titos haba kren bad ki lad pathai khubor hadien ba la wai ka jingbam smai ki MDC u la pynpaw ba ka jingbam smai ka jong u da ka ktien Khasi kadei namar ba hapoh ka ïing dorbar jong ka KHADC baroh ki MDC kila ban ia kren da ka ktien Khasi.
