Shillong,Rymphang,02: Katba ki sngi jong ka jingthep vote ban pynthymmai ia la ki Nongmihkhamt (MLA) sha Iingdorbar Thawaiñ ka Jylla ka la nang jan, ka jingmih madan ki kyrtong na ki seng sainpyrthei bapher bapher bad ruh ki kyrtong shimet (Independent) ki la nang khluit bad trei borbah ban ioh
ia ka jingjop bad ki la pynthikna ruh ialade da kaba leit thep kyrteng hakhmat ki Returning Officer (RO) bad kane ka jingthep kyrteng ki kyrtong ki la nangtuid katba nang mih ki sngi hadien ba ka Election Commission ka la pynbna ia ka tarik thep vote ha ka Jylla ka ban long ha ka 23 tarik u Rymphang 2013.
kum u kyrtong ka seng United Democratic Party (UDP) jong ka 25-Mawsynram myn ha ka 2 tarik mynta u bnai u la leit thep kyrteng ha khmat ka Returning Officer ha ryngkat ka jingsynran lang ki nongbud jong u lem bad ki paidbah nongkyrshan jong ka seng na ka thain Mawsynram. Ha kane ka sngi u Bah Khraw hakhmat ka Returning Officer u la pyndep ia la ka kamram bad u la pule ruh ia ka kular hakhmat ka ophisar katkum ki kyndon pyniaid elekshon jong ka ri India.
U Bah Khraw haba kren ha ki nongthoh khubor hadien ba dep ka jingthep kyrteng u la ong, “ha ka thain Mawsynram constituency ka don ka jingiashongkhleh jaidbynriew para nong India kumba long lem kiwei pat ki thain ha ka Jylla, nga la ioh ia ka jingkyrshan na ki nongshong shnong jong ka thain”.
U la ong ruh, kumba ka long mynta ka thain ka la sahdieh habaroh ki liang bad kam shym la don satia ka jigkylla ha ka liang ka jingkiew ka roi ka par la ka long ha ka liang ka kit ka bah ne ka surok ruh. “Ka jingialeh elekshon jong nga mynta ka long ban ialeh pyrshah ia ka jingsahdien jong ka thain bad ka bhah jong ki paidbah kan leit sha ki paidbah bad kam long kaba shongnia shonghok ban pyndonkam bakla ne bymdei ia ka hok jong ki paidbah kumjuh ruh ia ka hok ba ka constituency ka donhok ban nang kiew shaphrang ha ka roi ka par na ka bynta ka jingmyntoi jong ki paidbah.
Shuh shuh utei u kyrtong ka UDP na Mawsynram constituency u la pynpaw ba u ieng halor ka nongrim ban shakri ia ki paidbah halor ka roi ka par, kumba ka long mynta kam shym don kano kano ka roi ka par hynrei kat shaba phai tang ki jingsahdien, la ka long ha ka liang ki jaka sumar, surok bad kiwei kiwei ki jingmyntoi ki paidbah. Ka surok kaba long u budlum ban kyntiew ia ka roi ka par, ka ioh ka kot.
Khatduh u Bah Khraw u la kyntu kynpham ia ki paidbah ka thain kiba la don ia ka hok ban jied Nongmihkhmat (EPIC) ba kin ai ka jingkyrshan kaba khlain ban ioh ia ka jingjop ba donburom.(SP News)
