Shillong, Nailar 29: U Myntri Rangbah ka jylla u Conrad K Sangma haba jubab ia ka jingylli jong u bah Brightstarwell Marbaniang halor ka jingmang pisa ia ki skhim na ka North East Special Infrastructure Development Schement ( Other Than Road Infrastructure) naduh u snem 2019-2020 haduh 2023-2024, la ioh tang kawei ka skhim kata ka skhim sam um sha ki shnong ba markhap ka sor Tura kaba la kot sha ka T.97.77 klur.
Katkum ki jingbthah kiba la pynmih na ka DoNER ha ka 18/08/2023 kam shym buh por lano ban pyndep ia ki jingtrei ia ki skhim kiba la mang pisa ha kane ka skhim NESIDS (OTRI), ia ka skhim ban pynpoi um ha Tura la pyntrei da ka tnad sam um jong ka sorkar jylla.
Halor ki jingkylli bynrap jong u MLA ka Mawlai ba katkum ka jubab kaba la jubah hapoh Parliament kaba u la ioh kotpi la kdew ba ki don 8 tylli ki skhim kiba la pyntrei bad la don ruh ka jingpynlait pisa, u myntri rangbah u la ong ba ka skhim NESIDS kala don la san snem, bad ka jingkylli kaba la wan rah ka don ia ka OTRI, kumta ka jubab ruh ka long shai ba la ioh tang kawei ka skhim ban sam um sha ki nongsadong ka Tura.
U Myntri Rangbah la ong ba lyngba ka skhim NESIDS, shuwa ban phiah ia ka shaka OTRI kila don 12 tylli ki skhim kiba la pyntrei kyntup ia ka Substation ha Mawlai kaba la pynkiew ia ka jingtrei sha ka T.79.23 klur.
U myntri rangbah ka jylla u la ong ba katkum ka jingbthah hapoh ka jingmang pisa kaba 15 ka FC baroh ki don tylli ki skhim kaba la kot sha ka T.408.44 klur, hynrei ka sorkar jylla kala pynkhreh ia ka skhim na ka bynta khyndai tylli ki skhim kaba la kot sha ka T.435.44 klur tyngka, na kitei kawei la ioh ha Tura kiba dang sah mynta 8 tylli ki skhim kiba ym pat ioh pisa.
