Shillong, Nohprah 22: U Myntri Rangbah ka jylla u Conrad K Sangma haba kren sha ki nongwan ia shim bynta ha ka jingsam ia ki Cheque sha ki nongri jingri ha kane ka jylla Meghalaya lyngba ka Video Confrence kaba la long mynta ka sngi ha State Convention Centre u la ong “Nga la kham khlain mynta”.
Ha kane ka jingkren u myntri rangbah u la ai khublei ia baroh kito kiba la duwai lem na ka bynta jong u bad shen yn sa sdang ban leit trei noh kum ba juh long, u ai khublei ia baroh ki nongwan ia shim bynta ha kane ka jingplie paidbah ia ka skhim ri Sniang ha ka jylla.
Na ka liang jong u myntri rangbah ka jylla u la ong ba, ha dien ba ka sorkar kala iohi ba ki briew ka jylla ki khlain bha ban bam ia ka doh sniang bad ka jingwan jong ki sniang sha kane ka jylla ki long kaba bun dei na sha bar ka jylla bad kane ka pynishai ba ka pisa na kane ka jylla ka tuid shabar.
Na ka liang jong ka sorkar hapoh ka jingialam jong u myntri rangbah ka jylla kala shim ia kane ka rai ban pynshlur ia ki briew ha ki kam ri sniang bad ban peit ba ka jylla Meghalaya ka lah ban pyndap ia ka doh sniang na lade bad kane kan khanglad ia ka jingtuid ka pisa sha bar ka jylla.
La ong ba ha kane ka sngi la sam ia ki Cheque sha ki seng treilang ha baroh 11 tylli ki District ha ka jylla kaba la kot sha ka T.15 klur tyngka, kane ka long ka jingsdang bad kane ka pisa ka dei ka ram kaba khlem sut, u la ong ba dei tang ka jingiatrei shitom da baroh lang lah ban pynlong ia kane ka jingthmu kaba jop.
Ia ki Cheque sha ki 11 tylli ki District la sam da u bah Prestone Tynsong Symbut myntri rangbah ka jylla ha ka jingialang kaba la long mynta ka sngi ha State Convention Centre, ha ka jingiadon lang ki ophisar ka tnad ri jingri bad na ka tnad ba dei ia ki seng ia treilang.
