Shillong, Naitung 25: U MLA barim jong ka Ranikor u Martin M Danggo u la pyniasoh pura mynta ka sngi sha ka seng National People’s Party ha kaba la pdiang burom ia u ha ophis jong ka seng da u president u Dr WR Kharlukhi ha ka jingiadon lang ki nongialam jong ka seng.
Haba kren ha ki nongthoh khubor ha dien ba la dep ban pdiang burom ia u hapoh jong ka seng NPP, u Martin M Danggo, u la ong ba naduh ka por ba u jop nyngkong ka seng PDM kum u MLA jong ka Langrin ha kato ka por ka thong ka jong u ka long ban pynioh ia ka Civil Sub Division.
Naduh katei ka por u khlem shong thait u la ia kren na ka por sha ka por haba sorkar ha kaba ma u ruh u don lang hynrei kam shym la urlong kata ka jingkwah ka jong u na ka bynta ka roi ka par katei ka thain, dei ha u snem 2005 ba kila sdang ban ai ia ki dkhotkas na ka por sha ka por sha ka sorkar hynrei kam shym la urlong.
Dei ha kane ka sorkar kaba mynta ba mar ia leit ban ai ia ka dorkhas na ka liang jong u myntri rangbah ka jylla u Cornad K Sangma u la sngap ia ka jingdawa ka jong ki bad da lade u la leit sha Ranikor ban kular ha khmat jong ki paidbah bad tang hapoh 45 sngi la lah ban pynioh ia Civil Sub Division.
Kum ka dak jong ka jingburom ia u myntri rangbah ka jylla ngan shim tiket na ka seng NPP ban ia khun ia kane ka elekshon shiteng samoi. Haba jubab ia ka jingpynieng kyrtong jong ki wei ki party u Danngo u la ong ba “ Nga pdiang ia baroh kiba wan ialeh MLA na Ranikor, ki party ki don ka hoh ban pynienh kyrtong”.
Halor ka jingkynnoh ba u la leh bym suid niew ia ki NPP kiba rim kiba la dep don lypa, na ka liang jong u Danggo u la ong ba ia kane ka jingkynnoh um lah ban pdiang namar ba u dang ruh sha ka seng NPP mynta ka sngi kumno kin ong ba u khlem niew briew ia ki, mynta nga la rung wan kein ban ia trei lang, la ong u Bah Danggo.
