Shillong, Naitung 25: U Chief Executive Member jong ka KHADC u Bah Teinwell Dkhar haba jubab ia ka mat jingiakren kaba la wanrah da u nongialam ka liang pyrshah u Bah Lamphrang Blah halor ka phang ba kat nangmih ki sngi ki bor jng ka District Council kila nang shah sloit.
Haba jubab ia ki jingiakren jong ki dkhot ka iing dorbar halor kane ka phang, na ka liang jong u Bah Teinwell u la ong ba “ Ngam tharai kano kano ka sorkar ka lah ban pynduh ia ka bor jong ka District Council”. Ha ka juh ka por u la ong ba na ka liang jong ka EC kala shim khia ia kaei kaba la pynpaw da ki dkhot ha ka iing dorbar.
U CEM jong ka KHADC u la pyntip hapoh ka iing dorbar ba ha dien kane ka jingiashong dorbar, ha kine ki sngi kin sa leit ban ia kynduh ia u myntri rangbah ka jylla halor ka jingpynbna jong ka sorkar lyngba ka tnad khaii pateng jong ka sorkar jylla haba ia dei bad ki jaka ba don ki Industrial Estate, ka EC kan nym shongthiat halor kane.
Ha kane ka sngi, u CEM Bah Teinwell u la ong ba “ Ngi tip shai ba ki District Council, dei ba la ai bor da ka Sixth Schedule, kine ki jingmih baroh ka long tang kum ka jingpynthut lada ngim kyndit, la da ngi sngap ngin dang shah kdiah shuh shuh”.
“ Ngi la ia kren ruh halor ka rai jong ka iing bishar ba ha khliehduh jong ka Ri India, haba ia dei bad kane ka District Council ka hap ban iaid lang bad ka sorkar jylla khnang ba ka sorkar pdeng ruh kan sngap”. La ong u CEM ka KHADC u Bah Teinwell.
Halor katei ka rai jong ka iing bishar ba ha khliehduh jong ka Ri, ka KHADC kan dang hap ban ia mir jingmut bha bad ki muktiar kumno ban leh lada don kam ban thep ia ka “Review petition” ruh hap ban leh bad lada don kam hap ban khot ruh ia ka dorbar ba kyrpang ban ia kren. Na ka liang jong u CEM, u la ong ba ka jingwan jong ki hapoh ka iing dorbar ym ban ia die iathied hynrei ban pynneh pynsah.
Na ka liang jong ki MDC kiba la ia shim bynta ha kane ka jingiakren halor katei ka phang kaba la wanrah da u Bah Lamphrang Blah nongialam ka liang pyrshah ki long u Bah Lambor Malangniang MDC jong ka Nongkrem ha kaba u la kren halor ka jingpynbna jong ka sorkar jylla ha kaba ia dei bad ki jaka ba don ki karkhana ba kin hap shuh hapoh jong ka District Council ne ki khlieh nongsynshar.
U Bah Latiplang Kharkongor na Nongthymmai ha kaba u la ong ba kane ka jingpyrhang ban sloit ia ki bor jong ka KHADC kam dei shuh kaba dang thymmai hynrei ki dei ki jingpyrshah kiba la bun bun sien lyngba ki jingpynbna kiba wan na ka sorkar pdeng lane na ka sorkar jylla ruh kum juh.
Ha ka jingkren u Bah Gabriel Wahlang MDC na Nongstoin, u la ong ba ka long kaba ima ba katba dang mih ki sngi ka jingshah sloit jong ka District Cuncil kala dang paw pyrthei na ka por sha ka por. U la ong ruh hato ka KHADC ka dei tang ban ai NOC haba ka bor kam don shuh.
U Bah RV Lyngdoh ha ka jingkren jong u u la ong ba la don kam ban wanrah ia ka jingpynkylla ha ka AD Rule jong ka KHADC, la ong ruh ba lada kum ki trai kila shah ktah noh ka mut kim dei shuh ki trai, la ong ba lada don kam dei ban kiew iingleh iingsaw ruh ia kiba don kam ban leh.
