Shillong, Naitung 04: Haba kren kum u kongsan ha ka jingialang kaba la pynlong da ka Khasi Author’s Society (KAS) ha Shillong College ban ialeh kumno ban pynioh rung ia ka ktieh khasi hapoh ka eight schedule jong ka Riti synshar jong ka Ri India, u Bah Samlin Malngiang myntri ba dei peit ia ka tnad umbam umdih jong ka sorkar jylla u la ong ba un sa ia kren hapoh ka kabinet ban wanrah ia ka hapoh ka iing dorbar thawain ka jylla.
U myntri ka sorkar jylla u la ong ba ka jaidbynriew kaba dang ialeh ka dei ka jaidbynriew kaba dang im, ka jaidbynriew ka dang khih phaloh, bad kumba ka long mynta ka jaidbynriew khasi kala dang kiew ha kiba bun ki liang. Ka ktien khasi kala biang ka ryngieng ryniot ba kan ioh rung ha ka eight schedule jong ka Ri India.
Ka Ministry Home Affair jong ka sorkar pdeng mynta ka dang bishar bniah ia ki 38 tylli ki jaid ktien ban pynrung ha ka eight schedule jong ka Ri bad kawei na kita ki ktien ka dei ka ktien khasi. U la ong ba ha ka jingdon ka jong ki ha Delhi ha kine ki sngi kila ia kynduh ia u Vice President jong ka Ri India u Venkaiah Naidu u la ong ia ki, wat juh klet ia ka ktien kaba ka kmie kaba pun ka kha.
U Bah Samlin, u la ong ba mynta ka dei ka bynta ka jong u ban ia kren hapoh ka kabinet ban wanrah ia kane ka phang ban ia kren hapoh Assembly na ka liang jong ka sorkar, u la ong “ Nga lehnrain ban ioh ba ka KAS ka iakhih na ka bynta ban dawa ban pynrung ia ka ktien khasi hapoh ka khyrngit kaba phra jong ka Riti synshar jong ka Ri India, haba ki nongmih khmat kim iohi”.U Bah Samlin u la ong haba im ka ktien im ka jaidbynriew.
Kane ka jingialang jong ka KAS kaba mynta ka sngi ka long ka jingialang kaba nyngkong ban sdang ia ka jingiakhih ka jong ki ban dawa na ka sorkar ba ka dei ban leh ei ei ban pynrung ia ka ktien khasi sha ka eight Schedule bad nangne ka KAS kan sa pynlong ia kane ka juh ka jingialang sha baroh san tylli ki District ha Lum khasi bad kin pynlong pat ia ka jingiaid paidbah ban pynmih sha ka pyrthei ba ka sorkar ka dei ban pynrung noh ia ka ktien khasi sha ka eight Schedule.
Ia kane ka jingialang mynta ka sngi la phaih ha ki lai bynta, ka bynta kaba nyngkong ha kaba ki dkhot jong ka KAS kila ia phylliew jingmut kumno ban dang pynkhlain ia ka ktien khasi, ka bynta kaba ar ka long ban ia kren kumno ka ktien ka sdang ban ringsdot haba la pyndon kam bakla ia ka rukom kren bad ka bynta kaba lai ka long aiu ki nongmih khmat ki sngew halor kane ia kaba la kren da u Bah HS Shylla CEM jong ka KHADC bad u Bah Samlin Malngiang myntri jong ka sorkar jylla.
