Shillong, Risaw 15: Mynta ka sngi u Bah Adelbert Nongrum MLA ryngkat u rangbah shnong ka Mawkhar u Bah Arwan Tariang, u rangbah shnong ka Wahthapbroo u Bah
Job Rymbai kila jurip ia ka thain Motphran ha kaba ia dei bad ki jingtrei kiba dang sah teng kaba la buh ia kine ki ar tylli ki shnong ha ka jingeh.
Ha kane ka jingwan jurip na ka liang jong ki nongkit kam shnong ka Wahthapbroo kila kdew ia ka jingeh kaba ia dei bad ki pipe um kiba wan na iewduh kiba ka PWD haduh mynta la jan ar snem kam shym la pyndep ban shna bha khnang ba ka um kaba mih na ki pipe um kan nym tuid sha surok bad la iakren ruh ia ka jingker kaba dei ban lehnoh.
Haba phai pat sha Motphran pyrshah ia ka Palace u kontroktor ba pyntrei ia kane ka surok na ka skhim ban pynitynnad ia ka Motphrah u la shu ieh khlem da shna pyndep ia ka nala bad kane kala buh ha ka jingeh ha kaba ia dei bad ka jingtuid jong ka um ha katei ka jaka.
Ha dien ba la dep ban jurip na ka liang jong u MLA kane ka thain u Bah Adelbert Nongrum u la ong ba yn sa budien ia kane ka kam bad ka PWD, ka tnad pynroi sor, haba ia dei bad ka jingdap ki nongdie jingdie ha ki lynti iaid kjat un sa kylli ia ka sorkar hato la shna na ka bynta ban iaid briew ne ban die jingdie.
Haba ia dei bad ka jingkhapngiah jong ka Motphran, na ka liang jong u MLA u la ong ba kane ka long namar ba la shu khang sah ia ka surok ha them iew Mawlong bad kane ka jingkhang sah ia kane ka surok ban iaid ki kali kala pynkhapngiah haduh katne katne ia ka Motphran. H akane ka sngi la don lang ruh u engineer na ka Central Shillong Division jong ka tnad PWD bad ki pulit na Lumdiengjri Police Station.
