Shillong, Naiwieng 03: Ka KSU Mawlai Circle mynta ka sngi haka jingïalam jong U Samla Rapborlang Nongrum General Secretary KSU Mawlai Circle bad uba dei ruh u Assistant Finance Secretary jong ka CEC kila leit ai jingïarap ïaki 2 tylli ki long ïing kiba la mad ïaka jingshah bamduh haka ding ha ka janmiet jong ka 1tarik Naiwieng 2021.
Kum ka Seng kaba ju peit bad ban ïa khun ïaleh na bynta kiba bun ki dawbah kiba ktah matïong ïaka Ri bad ka Jaidbynriew hynrei kam shym la klet lane iehnoh ïala ki paradoh parasnam haba ki ïa kynduh ïa kiba kum kine ki jingjia kiba khlem da khmih lynti ne poi pyrkhat.
Kumta khnang ban ïa kit ïa tynrong lang ïaka khia ka shon jong kitei ki longïing, naka liang jong ka Seng kala ïoh ban leit noh jingïarap da ki tiar shet tiar tiew, u Khaw ki Kombor ha ryngkat ka pisa sha kitei ki longïing kaban long kum shi bynta ban ïarap ïaki ba kin sdang thymmai pat ïaki kam ki jam ki jong ki haka ban kyrshan ïala ki jong ki ïing ki Sem.
Hashwa ban aiti noh ïa kitei ki tiar kala don ka jingïalang ba lyngkot ïa kaba la pynïaid da u Samla John Kyrshan Hashah uba dei u President jong ka KSU Mawkynroh Umshing Unit, la ïalam haka ban dwai da u Samla Lambert R.Shabong uba dei u General Secretary jong ka KSU Mawkynroh Umshing Unit.
Ha katei ka sngi la pynshngaiñ lang da ka jing ïadonlang jong u Rangbah Dong jong ka Dong Pdengshnong Block 3 iba la ai ruh ïaka jingkren ka jong u ba kum u nongïalam shnong u pdiang sngewbha ïaka Seng bad u dap ruh da ka jing sngewnguh kaba shi katdei ba kala long kaba kloi ban wan noh lang la u synñiang u bynhei ïa kitei ki long ïing kiba kynduh ïa kum katei ka jingjia bad naka liang jong u ula kular ba kum ka Shnong kan don ryngkat ryngkat bad kitei ki longing.
Naduh ba jia katei ka jingjia bad kumjuh ruh ban dang ïai ïadon ha syndah jong ki haki sngi kiba dang wan. Khatduh ha katei ka janmiet la ïoh ïaka jingkren na u Samla Rapborlang Nongrum uba la ai mynsiem ïa kitei ki long ïing ba kim dei ban duh jing kyrmen haba ki tyngkhuh ïa kiba kum kitei ki jingjia.
Hakum kane ki jingjia ba kin shaniah ha u Blei ba kiei kiei baroh kin long katkum ka jingpynïaid bastad jong u Nongbuh Nongthaw bad ba kiba bha kin sa wan biang haki sngi kiba dangwan bad ba kin nang man bha bad ba kin nangroi haka kamai kajih bad ki kam ki jam jong ki kiba manla ka sngi.
U la bynrap ruh ba kum ka Seng hala i bor i barit ka ju pyrshang ban kner lem la ka kti leh isynei ïa man ki dkhot jong ka Jaidbynriew kiba ïa kynduh jingeh khamtam hakum kine ki jingjia kiba kim shym la tip lupa bad u la ong ba naka liang jong ka Seng ka ngeit skhem ba kitei ki longïing kin pdianghun mynsiem ïa kine ki jingai jong ngi ka Jylli.
“Ainguh ïa U Blei ba u lada la ri kyrpang ïa kine ki longïing ba kam shym ladon kano kano ka jingjia ba sngewsih ne ka ban wanrah ïaka jing mynsaw wat tang ïa iwei ruh i dkhot jong kitei ki longïing”, la pynkut u Samla Rapborlang Nongrum ïa ka jingren jong u.
