Shillong, Nohprah 31: ka MATTI Charitbale Society kaba dei ka kynhun treimon sngewbha kala noh jingiarap sha ki don jingduna ha ki dkhot met da ka jingiatrei lang bad ka Khasi Hills Disable Association.
Haka jingkren jong ka kong Grace Kharpuri MDC kum ka kongsan kala ong ba ki briew kiba don ka jingduna ha ki dkhot met ki dei kiba u Blei u la thaw kyrpang bad kum ka nongmih khmat ka angnud ban ia shnoh kti lang na ka bynta ai ia ki jingiarap. Ha kane ka sngi la ioh ruh ia ka jingkren na u Rev B Syiem u ba dei u nongai buid ai bor ia ka MATTI.
Kine kiba la ioh jingiarap ki long 12 ngut na East Khasi Hills, 3 ngut na West Jiantia HillsDistrict, 5 ngut na Ri Bhoi District, katba na West Khasi Hills District, East Jiantia Hills District bad South West Khasi Hills District ki ioh mar iwei.
Ka jingiarap kaba ka MATTI kala ai ka long mar lai hajar tyngka marwei bad ki blanket. Ia kiba la wan ban synranglang ruh la ai mar kawei ka jainkup. Ia ka jingialang la pynlong ha KJP Girls Higher Secondary School.
Ia ka jingialang la pyniaid da u bah R L Thabah President, ia ka jingduwai la pyndep da u bah K Ryntathiang bad la ioh ia ka jingkren na u bah Starwin Kharjana. Ha ka jingkren u General Secretary u la pynpaw ia ka jingsngewnguh ia ka MATTI kaba la kloi ban wan ai ia kane ka jingiarap.
