Shillong, Naitung 26: Kiba bun ki dong bad ki jaka ha kane ka nongbah Shillong kiba la shah pynbna kum ki Containment area kila pakhang lynti da ki jingker ha ki surok ban pynthikna ba ki briew kim dei ban ia rung ia mih ha kine ki jaka.
Kane ka jingpakhang ia ki surok, ki lynti shnong kiba rung sha kito ki jaka bala pynbna kum ki Containment area la leh da ki bor shnong ban pynthikna ban nymdon ka jingiarung ia mih ki paidbah sha kito ki jaka.
Haduh mynta ka sngi ki dong hapoh kane ka nongbah Shillong kiba la pynbna da ki bor jong ka District Administration ba ki dei ki Containment area ki long arphew hynriew tylli.
U Director ka tnad ka koit ka khiah u Dr Aman War u la ong ba kane ka jingpakhang bad ka jingpynbna Containment area ka long ban sukh ban wat ia kito kiba don ka jingiajan bad kiba la test COVID-19 positive.
