Mawngap, Iaiong 21: Mynta ka sngi ki paidbah kiba dang bat iala ka niam tynrai palat lak na kylleng ka Bri u Hynniewtrep kila ia tuid sha ka jingialang ba 32 jong ka “Seng Khihlang” kaba la long ha Mawngap ia kaba la pynkut mynta ka sngi”.
Ia kane ka jingialang ba shisien shisnem jong ka Seng Khihlang mynta u snem 2019 kala sdang ha ka 19 tarik bad la pynkut mynta ka sngi. Ha kine ki lai sngi kila don jinglehniam bad kum juh ka jingpyniala ki riti dustur na kylleng kylleng ka Bri u Hynniewtrep.
Ka phangpdeng jong kane ka lympung kaba 32 jong ka Seng Khihlang ka long “Im Ka Jaidbynriew Im Ka Nima”. Ha ka sngi sdang la pdiang burom ia u Mawbynna bad ha ka sngi kaba but la pynieng ia ki Mawbynna hapoh ka jingialam jong u rangbah Tores Sunn ha ka jingiadon lang ki nongialam seng.
Ha kane ka sngi pynkut u General Secretary I bah Mario Biam jong ka seng u la ai ia ka kaiphot kaba lyngkot ha kaba ia dei bad ka seng. Ha dien ka jingkren jong une u rangbah la don ka jingpyninam ia la ki riti dustur bad ki nongkren kiba la wan sakhi lang na kiwei ki jylla. Ha kane ka sngi u myntri ka sorkar jylla u Bah Samlin Malangniang u la ia don lang, ki MLA kiba la don lang ki long u Bah SK Sunn MLA jong kane ka jaka, u Bah Wailad Shylla, u Bah Lamphrang Blah MDC.
