Shillong, Naitung 02: Ka Education Cell Jong ka Khasi Students’ Union, mynta ka sngi ka la ioh ban phah ïa ka shithi sha ka Dr. Ampareen Mazel Lyngdoh kaba dei ruh ka Myntri ka koit ka khiah Jong ka jylla, halor ki mat kiba iadei bad ka bhah MBBS kaba ju mang da ka Sorkar Jylla na ka bynta ki samla pule man la u Snem.
Kane ka shithi ba la phah da ka Seng, ka long ban pan jingshai na ka tnat ka Koit ka khiah ïa ka jingdon ki seats Jong ki samla pule Doctor ba ju phah da ka Sorkar jylla sha ki jaka pule bapher bapher kylleng ka Ri India.
Na ki daw ba ju sakhi haki snem ba lah dep, ka Seng ka lah kyntu ia ka Tnat Jong ka Koit ka Khiah ba lada jia ba ki samla kiba dei ki Khasi ne Garo, lada ki ioh ban rung lane ki kynjoh ban poi sha ka Open Category, Kum ia kita dei ban pynrung beit sha katei ka Open Category, khnang ba kiwei ki samla na ki reserved categories ruh kin ioh bynta lang ban rung ha ki categories ba la bhah kyrpang iaki.
Ka Seng, ka la ai jingmut ruh iaka Tnat ka Koit ka khiah, ba lada don ki samla, hadien ba ki la pass iaka NEET exams, lada ki poi sha ka kyrdan ban ioh rung sha ka All India Quota, Kum Kum iakita ruh dei ban ailad, khnang ba kin don shuh shuh ki samla na ka jylla ki ban iohlad ban leit pyntbit ha ka kam Doktor.
Shuh shuh ka seng ka la ban jur iaka sorkar ba ka jingpynbeit iakane ka bhah ban leit pule Doktor ka dei ban long kaba shai, kaba khuid , ba suba, bym don jingleh shiliang ne shah liang bad ym dei ban buhrieh ia ki jingshisha,hynrei dei ban long haba shit haba shai kaban pynhun lang ia baroh.
Ka Seng, ka wer ka kyrpad iaki Shnong ki thaw, Ki Hima ha kylleng ka bri u Hynniewtrep ban nym ai kot pynshisha lane Residential Certificate iaki bym dei ki paradoh parasnam, namar kane ka ktah iaka bhah leit pule ba lah mang kyrpang iaki samla trai Ri Jong ka Bri Hynniewtrep.
Kum kane ka jingjia, ka lah jia teng ha u snem ba la dep, ha kaba ka seng ka hap ban ieng pyrshah bad dawa pynduh bad weng syndon ia uwei u bar jylla uba kam ba u dei u trai Ri.
Te kumta na ka bynta ka bha ka miat bad ka jingmyntoi ki samla ka Ri, ka Seng lyngba kane ka kyrwoh ka kyrmen Skhem ba ka jingpynbeit ban phah leit pule Doktor iaki samla ka Ri, Kan long kaba iaid beit iaid ryntih ha baroh ki liang bad Kan nym don ka jingbuhrieh la ka long ha kano Kano ka liang.
Ka Seng ka kyntu iaka Sorkar ba kam dei ban pdiang kulmar iaki kot ki sla jong ki bar jylla kiba myllien ban ialam bakla bad ruh kiba kam ba ki dei ki nong shong Shnong Jong kane ka Jylla tang ban ioh bynta ha ka bhah leit pule Doktor kaba dei hok tang iaki samla pule trai Ri, kane ka long katkum ka kyrwoh kaba la phah da u samla pule Pynkmenlang Sanmiet Education Secretary ka KSU.
