Shillong, Risaw 27: Ka Dong Moopyniein kala leit ban ai da ka jingthoh sha u Doloi jong ka Elaka Jowai ban pan na u ia ka jingithuh noh ia katei ka dong kum ka shnong ba pura katkum ka ain ‘The Jiantia Hills Autonomous District (Establishment of Elaka and Village, Appointment, Power, Function and Jurisdiction of Doloi/Sirdar and Waheh Shnong Act) 2015 katkum ka kyndon kaba 20 jong katei ka ain.
Ha ka jingthoh kaba la phah sha u Doloi ka Elaka Jowai bad sha u Chief Executive Member jong ka JKHADC u Bah Thombor Shiwat bad sha ki saw ngut ki Executive Member , la ong ba ki nongshnong shnong jong ka Dong Moopyniein, Wapungskur kaba hap hapoh jong ka Elaka Jowai kaba hap hapoh jong ka West Jaintia Hills District kiba la shong la sah naduh kip or mynbarim ki kwah ban ioh noh ia ka jingithuh ia ka kum ka shnong ba pura.
Ka jingkwah jong ki paidbah nongshong shnong jong ka Dong Moopyniein ban ioh noh la ka jong ka Shnong ka long na ka bynta ban kyntiew ia ka roi kapar, ka shynshar khaddar , ka shong suk shongain ka bha ka miat, kan kham jan ka jingpyniaid shnong, kumta ki paidbah nongshong shnong hapoh katei ka dong ki kwah ban ioh noh ia ka dorbar shnong.
Haba ia dei bad kane ka jingpan ban ioh ia ka kyrdan dorbar shnong kum ki paidbah nongshong shnong kila juh ia kynduh na ka por sha ka por ban ia mit jingmut halor kane ka phang. Ha dien ka jingiakynduh kaba la bun sien bad kyrpang ha u bnai ba la dep ki paidbah kila shim ia ka rai ban pan noh na ki bor ba dei peit ban ithuh noh ia ka Dong Moopyniein kum ka dorbar shnong hapoh ki kyndon jong ka ain kaba la kdew shai haneng.
Haduh mynta kane ka dong ka hap hapoh jong ka jingpeit jong ka thain Wapung ka dei ka dong kaba la rih bha. Ha kane ka shithi kaba la ai sha u Doloi jong ka Elaka Jowai, ka Dong Moopyniein kala kdew ruh ia ki pud ki sam saw dong jong kane ka dong lada ioh noh ia ka dorbar shnong.
Ki pud sawdong kiba la kdew ki ban hap lada ioh noh ia ka jingithuh kum ka shnong ki long, Mihngi ka iakhap bad ka shnong Pamra Paithlu bad shnong Mookhep, na Sepngi ia khap bad ka shnong Wapungskur, na shatei ka ia khap bad ka shnnong Wapungskur bad sha thie ia ka khap bad ka shnong Mookhep.
Ia kane ka shithi kaba la leit ban ai sha u Doloi ka Elaka Jowai la sain da u bah Cheerful Ryngkhlem kum u Chairman ka Dong Moopyniein,Wapungskul bad u bah Deibormi L Rymbai Secretary jong ka Dong Moopyniein, Wapungskur.
