Laitlyngkot,Naitung 10: Ka National Highway Infrastructure Development Corporation (NHIDCL) kaba peit ia ka jingshna ia ka surok Shillong Dawki haduh mytna kam pat maramot ia ka surok kaba la twa harum Laitlyngkot kam pat maramot haduh mynta wat la ka jingtwa kala kot sha ka artaiew.
Kane ka jingleh kala pynkyndit ba ia ka surok kaba la dkut noh harum Laitlyngkot, kaba la iaid sha ka shiteng bnai, hynrei ym pat ktah eiei wat la ha ka sngi ba twa la trei ban pynhap khyndew bad ki briew jong ka NHIDCL ki ong ba hapdeng lai saw sngi kin pyndep humrei mynta la ar taiew kim pat leh ei ei.
Haba ki nongthoh khubor kila leit sha katei ka jaka ha ka sngi Palei ka 9/7/2026 la iohi ba ka jaka ka la kynjah slam slam khlem don briew khlem don nongtrei satia lait noh tang ka jingkhang da ka khyndew ia katei ka jaka kaba don hajan ka surok ba dkut.
Ka jingdkut katei ka surok Shillong-Pynursla-Dawki ka la buh jingeh ia ka leit ka wan jong ki paidbah ka thain Pynursla bad mynta kila hap ban shu pyndonkam ban iaid na surok khohruh khohram na Iewmawiong, Umthli, Nongthymmai ban mih sha surok bah Khrik Lyngkhoh ha Laitkynsew ban poi ha surokbah khnang ban iaid kiar na katei ka jaka kaba dkut ka surok.
Ha ka jingiakren bad ki briew ka kompeni kaba pyntrei ia kane ka surok, la iathuh ba ki dang ap ban ioh jingbit na ka bor ba dei peit kum ka NHIDCL. Kila ong ba namar ba kim pat ioh jingbit, kumta kim pat ktah eiei ban pynbha biang ia katei ka jaka kaba la dkut ka surok.
La iathuh ba hap ka donkam ban tih ia u lum namar ban shu pyndap kala kham eh ba jrong ka riat haduh 300 metre bad kila ong ba kan shim por ban pyndep hapoh 3 bnai ban pyniasoh biang ia ka surok kaba dkut.
