Shillong, Jylliew 17: Ka tnad sam um jong ka sorkar jylla kala leit ban buh ia ki pipe um naduh surok bah G.S Road na lat Lynti rim shaduh Mawiong mynta la palat shisnem hynrei ym pa ioh dak ban sdang ban pyntrei ia ka kam.
Ka shnong Mawiong baroh kawei ka dei ka jaka kaba ki paidbah ki ia kynduh ia ka jingeh ha ka liang jong ka um, bun na ki long iing ki hap ban shuthied ia ka um namar ba kam biang umbam umdih baroh shisnem lynter.
Kaba pynpoi Um Mawiong baroh kawei dei na ka jaka sam um kaba shu pump ia ka um na ka wah Umshing, hynrei bun sien kane ka pump um ka duh namar kane ka pump ka dei kaba la slem bad ban ioh tiar ban maramot haba ka sniew ka shim por ban ioh tiar.
Ban pynbiang ia ka um ha Mawiong ka sorkar kala kynthup ia ka hapoh ka Greater Shillong Water Supply Schme (GSWSS) bad ki thymmei khubor ki iathuh ba kitei ki pipe kiba la buh shilynter ka surok bah ka long ban pynioh um ia ka shnong Mawiong, Mawiong Umjapung bad Mawiongrim.
Kine ki pipe um kiba la buh ha shilynter ka surok ki don ar jait wei ba jyrngam bad wei pat ba iong, ki pipe ba jyrngam ki kham heh ban ia ki pipe kiba iong, kine ki pipe um kila don ha surok mynta la shisnem tam ha kaba ym pat ioh ba kan don ka jingsdang ban pyntrei ia ka kam ban ring um.
